आदिकवि सिटिजन अक्षय छात्रवृत्ति कोष स्थापना
दमौली : तनहुँको व्यास–१ विज्ञानचौरस्थित आदिकवि भानुभक्त क्याम्पसमा छात्रवृत्ति कोष स्थापना गरिएको छ । क्याम्पस र सिटिजन बैंक, दमौली शाखाबीच व्यवस्थापन संकाय अन्तर्गत स्नातक तहमा अध्ययनरत विद्यार्थीहरूलाई लक्षित गर्दै ‘आदिकवि सिटिजन अक्षय छात्रवृत्ति कोष’ स्थापना गर्ने सम्झौता गरिएको हो ।
क्याम्पसमा मंगलबार आयोजित एक कार्यक्रममा क्याम्पस प्रमुख महाप्रसाद हडखले र बैंकका शाखा प्रबन्धक श्याम हरि तिवारीले सम्झौतापत्रमा हस्ताक्षर गरेका छन् ।
१ लाख २ हजार रुपैयाँको कोष बैंक र क्याम्पसले ५१/५१ हजार रुपैयाँ बराबरको अंशदानमा स्थापन गरिएको बताइएको छ । दुवै संस्थाले यस अक्षय कोषलाई आगामी वर्षहरूमा थप वृद्धि गर्दै लैजाने प्रतिबद्धता जनाएका छन् ।
कोषको मुख्य उद्देश्य व्यवस्थापन संकाय अन्तर्गत अध्ययनरत विद्यार्थीहरूको उच्च शिक्षामा पहुँच वृद्धि गर्नु रहेको क्याम्पस प्रमुख हड्खलेले जानकारी गराए ।
हाल क्याम्पसमा बिबिएस र बिबिए कार्यक्रम अन्तर्गत करिब १ हजार विद्यार्थी अध्ययनरत छन्, जसमा ९० प्रतिशतभन्दा बढी तनहुँ, लमजुङ र गोरखा जिल्लाका ग्रामीण तथा आर्थिक रूपमा पिछडिएका वर्गका विद्यार्थीहरू रहेका छन् ।
