गण्डकी प्रदेशको मुख्य नाका आँबुखैरेनीको बेनीटारमा लापसे परीक्षण
दमौली : गण्डकी प्रदेशको मुख्य नाका तनहुँको आँबुखैरेनीमा मंगलबारदेखि लागुपदार्थ सेवन (लापसे) परीक्षण सुरु गरिएको छ । इलाका प्रहरी कार्यालय आँबुखैरेनीले आँबुखैरेनी–४ बेनीटारमा लापसे परीक्षण सुरु गरेको हो ।
आँबुखैरेनी गाउँपालिका र आँबुखैरेनी अस्पतालको सहयोगमा लापसे परीक्षण सुरु गरिएको इप्रका आँबुखैरेनीका प्रहरी निरीषक टेकप्रसाद सुवेदीले जानकारी दिए । प्रदेश भित्रिने सवारी साधनका चालकले लागुपदार्थ सेवन गरे नगरेको परीक्षणका लागि यो अभियान सुरु गरिएको उनले बताए । यो अभियानले सवारी दुर्घटना न्यूनीकरणका लागि सघाउने उनको भनाइ छ ।
लागुपदार्थ सेवन गरेर सवारी चलाउँदा दुर्घटना हुन सक्ने र ज्यानै जाने गरेका छन्, यसलाई नियन्त्रणका लागि यो अभियान प्रभावकारी बनाउनका लागि इप्रका आँवुखैरेनीले लापसे परीक्षण सुरु गरेको हो ।
लापसे परीक्षण शुभारम्भ कार्यक्रममा गाउँपालिकाका अध्यक्ष शुक्र चुमानले सवारी दुर्घटना न्यूनीकरण गर्ने उद्देश्यसहित लापसे परीक्षण सुरु गरिएको हुँदा यस कार्यका लागि सबैलाई सहयोग सहकार्य गर्न आग्रह गरे ।
यस्तै, आँबुखैरेनी गाउँपालिका–४ बेनिटार स्थित पृथ्वी राजमार्गबाट लागुऔषध सहित मंगलबार तीन जना पक्राउ परेका छन् ।
पक्राउ पर्नेमा नवलपरासी बर्दघाट सुस्ता पश्चिम पाल्हिनन्दन गाउँपालिका–१ बस्ने १९ वर्षीय अखिलेश कुमार यादव, सोही गाउँपालिकाको वडा नं. २ बस्ने २२ वर्षीय शिव पत्तरकट र नवलपरासी बर्दघाट सुस्ता पश्रुचिम सरावल गाउँपालिका–२ बस्ने १९ वर्षीय सन्दिप चौहान रहेको इलाका प्रहरी कार्यालय आँबुखैरेनीले जनाएको छ ।
प्रहरीले निजहकरुको साथबाट दुई सय थान डाइजेपाम, दुई सय थान फेनरागन र दुई सय थान नुफिन बरामद गरेको छ ।
