व्यासका २ वडामा शिक्षाका लागि एसओअएस बालग्राम परियोजना शुरु, परियोजनाका लागि १० करोडको कार्यक्रम घोषणा

• भञ्ज्याङ समाचारदाता (दमौली)

एसओएस बालग्राम नेपालले व्यास नगरपालिकाका दुइ वटा वडामा समुदायमा आधारित सबलीकरण कार्यक्रम शुरु गरेको छ । ‘सबै बालबालिकाका लागि मायालु घर’ भन्ने नारासहित बालग्रामले व्यास नगरपालिकाको वडा नं. १३ र १४ मा उक्त कार्यक्रम शुरु गरेको हो ।

वडा नं. १३ पोखरीभञ्ज्याङमा बुधबार आयोजित एक कार्यक्रममा व्यास नगरपालिकाका प्रमुख बैकुण्ठ न्यौपाने र बालग्रामका अध्यक्ष ज्योतिरत्न धाख्वाले संयुक्त रुपमा कार्यक्रमको घोषणा गरेका छन् ।

सो अवसरमा न्यौपानेले बालग्रामले नगरपालिकालाई छनोट गरेर उक्त परियोजना शुरुआत गरेकामा धन्यवाद ज्ञापन गर्दै यो परियोजनाले समुदायका बालबालिकाको शिक्षास्तर उकास्न मद्दत पुग्ने विश्वास व्यक्त गरे ।

बालग्राम नेपालका अध्यक्ष डा ज्योतिरत्न धाख्वाले तीन वर्षसम्म दुइ वडामा परियोजना सञ्चालन गरिने जानकारी गराएका थिए । संस्थाले बालबालिका, विद्यालय तथा अभिभावक सबैका क्षेत्रमा सहयोग गर्ने भन्दै उनले वातावरणमा सुधार गरेर बालबालिकाको शिक्षास्तर उकास्न कार्यक्रम लक्षित रहेको जानकारी गराए ।

संस्थाले यस अघि विपन्न वर्गका बालबालिकालाई आवासिय शिक्षा दिंदै आइरहेको छ । तर अब समग्र समुदायकै शिक्षस्तर वृद्धिमा सघाउन सकिएमा धेरैको शिक्षास्तर उकासेर असल नागरिक उत्पादनको अपेक्षा गरिएको अध्यक्ष धाख्वाले बताए ।

उक्त कार्यक्रमका लागि बालग्रामले तीन वर्षा दश करोड रुपैयाँ खर्च गर्नेछ । परियोजनामार्फ समुदायका विपन्न वर्गका बालबालिकाको शिक्षामा सुधार, अभिभावकलाई आयआर्जनमा लगानी लगायत कार्यक्रम सञ्चालन गरिने बालग्राम कार्यक्रम निर्देशक उपेन्द्र मल्लले जानकारी दिए । एसओएस बालग्राम नेपालले अभिभावक गुमाएका, द्वन्द्वपीडित तथा सीमान्तकृत समुदायका बालबालिकाको अभिभावकत्व ग्रहण गर्दै आएको छ ।

दुवै वडाका विपन्न र दलित वर्गका बालबालिकाले आर्थिक अभावमा पठनपाठन नै छाड्ने अवस्था आएकाले कार्यक्रमले यसलाई कम गर्ने आशा गरिएको व्यास-१४ का वडाध्यक्ष काजिमान श्रेष्ठले बताए । दलित र जनजाति समुदायको बाक्लो बस्ति रहेको यस क्षेत्रमा घरका कारण पनि स्तरीय शिक्षा लिन नपाएका बालबालिकालाई यस कार्यक्रमले सघाउँछ भन्ने हामीले विश्वास गरेको अध्यक्ष श्रेष्ठले बताए ।

कार्यक्रमअर्न्तगत सामुदायिक विद्यालयमा अध्ययनरत विद्यार्थीका अलावा संस्थागत विद्यालयमा छात्रवृत्तिमा पढेका बालबालिका र उनीहरुका परिवारलाई पनि शिक्षा र आयमूलक कार्यमा सघाइने संस्थाले जनाएको छ ।

घोषणा कार्यक्रममा नगर उपप्रमुख मिरा जोशी, प्रमुख जिल्ला अधिकारी सागर आचार्य, वडा नम्बर १३ का वडाध्यक्ष लेखबहादुर राना लगायत जनप्रतिनिधि तथा विद्यालयका अधिकारीहरु सहभागिता रहेको थियो ।

सेयर गर्नुहोस्

प्रतिक्रिया दिनुहोस्

सम्बन्धित खवर