तनहुँको बन्दीपुरमा औद्योगिक ग्राम स्थापनाका लागि अवलोकन
- भञ्ज्याङ समाचारदाता (डुम्रे)
तनहुँको बन्दीपुर गाउँपालिका-१ स्थित भुडाटारमा औद्योगिक ग्राम स्थापनाका लागि अवलोकन गरिएको छ । उद्योग वाणिज्य तथा आपूर्ति मन्त्रालयका सचिवको नेतृत्वमा घरेलु उद्योग विकास समितिका अध्यक्ष सहितको टोलीले उक्त ठाउँको अवलोकन गरेको हो ।
‘एक पालिका एक औद्योगिक ग्राम’ बनाउने सरकारको नीति बमोजिम बन्दीपुर गाउँपालिकाले भुडाटारमा औद्योगिक ग्राम बनाउन सिफारिस गरिएकाले सो स्थलको अवलोकन गरिएको वडाध्यक्ष भानुभक्त पोख्रेलले बताए ।
उक्त ग्राम स्थापनाका लागि संघीय सरकारले चालु आर्थिक वर्षमा एक करोड रुपैयाँ बजेट विनियोजन गरेको छ । सो कार्यका लागि भुडाटारमा रहेको ५० रोपनी सार्वजनिक जग्गा पहिचान गरिएको वडाअध्यक्ष पोख्रेलले बताए ।
छरिएर रहेका स-साना उद्योगहरूलाई एकीकृत गरी व्यवस्थित गर्न सरकारले एक पालिका एक औद्योगिक ग्राम कार्यक्रम ल्याएको थियो । औद्योगिक ग्राम स्थापनाका लागि हिमाली तथा दुर्गम क्षेत्रमा ३० रोपनी, पहाडी क्षेत्रमा चार रोपनी र तराइ क्षेत्रमा सात बिघा जग्गा हुनुपर्ने मापदण्ड बनाइएको छ ।
