थानीमाई मन्दिरमा एकैदिन ९१ फूलको डोली, करिब १० हजार भक्तजनको उपस्थित
भानु : तनहुँको भानु नगरपालिका–७ वसन्तपुरस्थित प्रसिद्ध धार्मिकस्थल थानीमाई मन्दिरमा कार्तिक महिनाको तेस्रो मंगलबार एकैदिन ९१ वटा फूलको डोली चढाइएको छ । आटे चाहेको मनोकामना पूरा हुने धार्मिक विश्वासका साथ तनहुँसहित विभिन्न जिल्लाबाट आएका भक्तजनले पञ्चेबाजासहित फूलको डोली चढाएका हुन् ।
मन्दिर संरक्षण समितिका अध्यक्ष जीवन थापा मगरका अनुसार भित्र्याइएका डोलीमध्ये तनहुँका ४२, लमजुङका ३२, गोरखाका १३ र काठमाडौँका दुईवटा रहेका छन् । सोमबार राति मन्दिर परिसरमा ४२१ जना भक्तजन जाग्राम बसेर बत्ती बालेका थिए । मंगलबार मात्रै करिब दश हजार हाराहारीका भक्तजनले मन्दिरको दर्शन गरेको उनले बताए ।
थानीमाई मन्दिरमा फूलको डोली चढाउने विशिष्ट धार्मिक परम्परा छ । भक्तजनले पञ्चेबाजाको तालमा नाचगान गर्दै फूलको डोलीसहित मन्दिरको तीनपटक परिक्रमा गर्छन् । त्यसपछि मन्दिर परिसरमा रहेको देवलमा डोलीसँगै ल्याइएको तोरण एक वा तीन फन्को घुमाएर बाँध्ने र मन्दिरभित्र प्रवेश गरी पूजाआजा गर्ने चलन छ ।
विशेषगरी मनोकामना पूरा भएपछि भक्तजनले सोमबार राती घरमा सत्यनारायणको पूजा लगाएर फूलको डोली चढाउन मन्दिरमा लिएर आउने परम्परा रहेको छ । कात्तिक र माघ महिनाको प्रत्येक मंगलबार यहाँ विशेष मेला लाग्ने गर्दछ। एकादशी, औँशी, सोह्रश्राद्ध र साउन महिनाभर भने मन्दिरको ढोका बन्द रहने मन्दिर संरक्षण समितिले जनाएको छ ।
समुद्री सतहबाट करिब एक हजार दुई सय मिटर उचाइमा रहेको थानीमाई मन्दिर धार्मिक आस्थाका साथै प्राकृतिक सौन्दर्यका दृष्टिले पनि महत्वपूर्ण मानिन्छ । मन्दिर परिसरबाट मिर्लुङकोट,तनहुँसुर, छिम्केश्वरी लगायतका उच्च पहाड, उपत्यका, बेसीका साथै गोरखाको लक्ष्मीबजार, लिगलिगकोट, पालुङटार, राइनासकोटलगायतका रमणीय क्षेत्र तथा हिमश्रृंखला अवलोकन गर्न सकिन्छ । धार्मिक मेला र प्राकृतिक दृश्यावलोकनका कारण थानीमाईमा भक्तजन तथा पर्यटकको आकर्षण बढ्दै गएको छ ।
