प्रथम व्यास मेयर कप फुटबलको उपाधी व्यास–१ ले जित्यो
दमौली : प्रथम व्यास मेयर कप फुटबल प्रतियोगिताको उपाधि व्यास नगरपालिका–१ ले जितेको छ । व्यास नगरपालिका नगर खेलकुद समितिको आयोजनामा व्यास–३ स्थित बीपी वनवाटिका खेलमैदानमा सम्पन्न फाइनलमा व्यास–८ लाई १–० गोलले पराजित गर्दै व्यास–१ ले पहिलो संस्करणको उपाधि जितेको हो ।
प्रतिस्पर्धात्मक खेलमा व्यास–१ ले गरेको एकमात्र गोल नै निर्णायक बन्यो । उपाधिसँगै विजेता टोलीले नगद एक लाख रुपैयाँ प्राप्त गरेको छ भने उपविजेता व्यास–८ ले ५० हजार रुपैयाँमा चित्त बुझाएको छ ।
सेमिफाइनलमा व्यास–८ ले व्यास–७ लाई र व्यास–१ ले व्यास–६ लाई पराजित गर्दै फाइनलमा स्थान बनाएका थिए। प्रतियोगितामा व्यास नगरपालिकाका १४ वटै वडाको सहभागिता रहेको थियो ।
प्रतियोगिताले स्थानीयस्तरमा फुटबल खेलको विकास, खेलाडीको प्रतिभा पहिचान तथा वडाबीच आपसी सद्भाव र एकता अभिवृद्धिमा योगदान पुर्याएको आयोजकले जनाएको छ ।
समापन कार्यक्रममा व्यास नगरपालिकाका प्रमुख वैकुण्ठ न्यौपानेले नगरपालिकाले खेलकुद क्षेत्रलाई प्राथमिकतामा राखेर काम गरिरहेको बताए । खेलकुदले युवाको प्रतिभा प्रस्फुटनसँगै अनुशासन, एकता र स्वस्थ समाज निर्माणमा महत्वपूर्ण भूमिका खेल्ने उनको भनाइ थियो ।
व्यास–६ का वडाध्यक्ष एवं नगर खेलकुद समितिका अध्यक्ष जीवन गुरुङले प्रतियोगिता सफल बनाउन सहयोग गर्ने खेलाडी, प्रशिक्षक, जनप्रतिनिधि, रेफ्री तथा खेलप्रेमीलाई धन्यवाद दिए ।
