अनुदान र स्थानीय खपतको नीतिले फूलमा आत्मनिर्भर बन्दै व्यास नगरपालिका
दमौली : किसानलाई अनुदान, उत्पादनको प्रोत्साहन र स्थानीय फूलको प्रयोगलाई प्राथमिकता दिन थालेपछि व्यास नगरपालिका पुष्प उत्पादनमा आत्मनिर्भर बन्दै गएको छ । तिहारमा आवश्यक सयपत्री र मखमली फूल नगरभित्रै उत्पादन हुन थालेपछि स्थानीय किसानको आम्दानी बढ्नुका साथै पुष्प खेती व्यावसायिक बन्दै गएको हो ।
पुष्प खेती विस्तारका लागि नगरपालिकाले किसानलाई उत्पादन सामग्री खरिदमा ५० प्रतिशत अनुदान उपलब्ध गराउँदै आएको छ । सयपत्री र मखमली फूल खेती गर्ने किसान, कृषि फर्म, कृषक समूह तथा सहकारीलाई लक्षित गरी सञ्चालन गरिएको कार्यक्रमले व्यावसायिक खेती विस्तारमा सहयोग पुगेको नगरपालिकाको भनाइ छ ।
अनुदान कार्यक्रमअन्तर्गत किसानले फूलको बीउ तथा बेर्ना, मलखाद, प्लान्ट हर्मोन तथा सूक्ष्म तत्त्व, कृषि औजार र उपकरण एवं बाली संरक्षण सामग्री खरिदमा सहयोग पाउने गरेका छन् । उत्पादन लागत घटाएर किसानलाई फूल खेतीतर्फ आकर्षित गर्ने उद्देश्यले कार्यक्रम सञ्चालन गरिएको हो ।
नगरपालिकाले उत्पादनसँगै बजार व्यवस्थापन र स्थानीय खपतलाई पनि प्राथमिकता दिएको छ। नगरभित्र फूल खेती गर्ने किसान तथा कृषि फर्मको विवरण सार्वजनिक गर्दै स्थानीय उत्पादन प्रयोग गर्न आग्रह गरिएको छ । व्यास–४ को चापाघाट कृषि फार्म, वडा नं. १० को कृप कृषि तथा पशु फार्म र वडा नं. १३ को मान्तिरीबारी फार्मलगायतका स्थानमा सयपत्री र मखमली फूल खेती भइरहेको छ ।
स्थानीय उत्पादनको बजार सुनिश्चित गर्न नगरपालिकाले कृत्रिम फूलमालाको उत्पादन, आयात, बिक्रीवितरण, भण्डारण तथा प्रयोगमा समेत प्रतिबन्ध लगाएको छ । सार्वजनिक सूचना जारी गर्दै प्लास्टिकजन्य कृत्रिम फूलमाला र सजावटी सामग्रीको सट्टा प्राकृतिक फूल तथा स्थानीय उत्पादन प्रयोग गर्न नगरवासीलाई आग्रह गरिएको छ ।
नगरपालिकाका प्रमुख प्रशासकीय अधिकृत सुकदेव लम्सालले किसानको आम्दानी वृद्धि, स्थानीय उत्पादनको प्रवर्द्र्धन र वातावरण संरक्षणलाई एकसाथ जोडेर पुष्प खेती विस्तारको नीति अघि बढाइएको बताए । स्थानीय उत्पादनको प्रयोग बढ्दा किसानले बजार पाउने र नगरभित्रै आर्थिक गतिविधि विस्तार हुने उनको भनाइ छ ।
तिहार, छठ, विवाह तथा विभिन्न धार्मिक र सांस्कृतिक कार्यक्रममा स्थानीय किसानले उत्पादन गरेका फूल प्रयोग गर्न नगरपालिकाले आग्रह गरेको छ । स्थानीय उत्पादनलाई प्राथमिकता दिने नीति प्रभावकारी कार्यान्वयन हुन सके बाहिरबाट फूल आयात गर्नुपर्ने निर्भरता घट्नुका साथै किसानको उत्पादनले बजार पाउने अपेक्षा गरिएको छ ।
