टुकादेवीको “बार्दली” विमोचन
राजकुमार आले
तनहुँकी साहित्यकार टुकादेवी पौडेल आचार्यको पहिलो प्रकाशित कृति लघुकथा संग्रह ‘बार्दली’को विमोचन गरिएको छ । विहीबार पञ्चमुनिदेव माध्यामिक विद्यालयको सभाहलमा सिमित साहित्यकारहरुको उपस्थितिमा पुस्तकको विमोचन गरिएको हो । पुस्तकमा ५१ वटा लघुकथाहरु समेटिएका छन् । ती कथाहरु वालमनोविज्ञान र सामाजिक विषयका छन् । पहिलेदेखि नै साहित्यिक क्षेत्रमा क्रियाशिल आर्चायले ‘बार्दली’ लघुकथा संग्रह प्रकाशित गरी औपचारिक रुपमा साहित्यिक यात्रा सुरु गरेकी छिन् ।
बार्दलीका लेखक आचार्य पञ्चमुनिदेव माविकी शिक्षिका हुन् । लघुकथा संग्रह विमोचन गर्दै नगरपालिकाका मेयर किसान गुरुङले बार्दली शब्दलाई आफुले नजिकबाट नियालेको हुनाले ‘बार्दली’ लघुकथा पढ्न छुट्टै आन्नद प्राप्त हुने विश्वास लिए । मेयर गुरुङले स्रष्टा आचार्यलाई आगामी दिनहरुमा पनि निरन्तर साहित्यिक यात्रामा लाग्न शुभकामना दिदै समाज निर्माणमा साहित्यको महत्वपूर्ण भुमिका हुने बताएका थिए ।
कार्यक्रममा लघुकथाकार तथा समालोचक हरि प्रसाद भण्डारीले कृतिको समिक्षा गरेका थिए । सो क्रममा भण्डारीले कथाका पात्र, परिवेश, सन्देश, विषय तथा भाषाशैली सबैको शसक्त प्रयोगले कृति उत्कृष्ट बनेको प्रतिक्रिया दिए । कथाका पात्रहरुको संयोजनबाट समाजमा रहेको विकृति, विसंगति, भष्ट्रचार र अनिमियता प्रति बार्दली लघुकथाले व्यङग्यात्मक रुपमा चोटिलो प्रहार गरेको बताए ।
पञ्चमुनिदेव माध्यमिक विद्यालय व्यवस्थापन समितिका अध्यक्ष सन्तोस श्रेष्ठको सभापतित्वमा भएको कार्यक्रममा गोरखा पत्र दैनिकका पुर्व प्रधान सम्पादक तथा लघुकथा समाज नेपालका अध्यक्ष श्रीओम श्रेष्ठ, रोदन, लघुकथा समाज नेपाल प्रदेश नम्वर १ की अध्यक्ष ममता मृदुल, शुक्ला साहित्य संगमका संरक्षक शेषमणी आचार्य, विद्यालयका प्रधानाध्यापक धु्रवकुमार मल्ल, सहायक प्रधानाध्यापक एकनारायण भण्डारी लगायतले बार्दली उत्कृष्ट रहेको प्रतिक्रिया दिदै स्रष्टा टुकादेवी पौडेल आचार्यलाई सफलताको शुभकामना दिए ।
