१७ भोट खसेपछि ऋषिङमा अधिवेशन स्थगित, भिमादमा पनि सर्वसम्मत नेतृत्व चयन गर्ने प्रयास जारी
भञ्ज्याङ न्यूज
नेपाली कांग्रेसको १४औं महाअधिवेशन अन्तरगत गाउँ/नगर अधिवेशन सुरु भएको छ । जिल्लाको १० पालिाका मध्ये शनिबार तीन पालिकाको सहमतिमा र ५ पालिकाको निर्वाचन प्रक्रियाबाट नेतृत्व चयान गरिएको छ । यस्तै, ऋषिङ गाउँपालिका र भिमाद नगरपालिकामा भने विवादका कारण अझै नेतृत्व चयान भएको छैन ।
ऋषिङ गाउँपालिकामा शनिबार भएको अधिवेशनमा १७ भोट खसेपछि स्थागित भएको छ । गाउँ सभापतिको चयनका लागि मतदात सुरु भएपनि विभिन्न वाहान गरी अधिवेशन स्थागित गरिएको जिल्ला सभापति बैकुण्ठ न्यौपानले बताए । उनले भने, ‘हाल नेतृत्वमा रहेकाले आफ्ना खेमाका उमेदवार निर्वाचित हुने सम्भावना कम देखेपछि मतदात रोकेको देखिएको छ ।’
गाउँ सभापति पद दावा गरी भोजराज रानाभाट, तिलबहादुर थापा, दानबहादुर श्रेष्ठ चुनावी प्रतिस्पर्धामा उत्रिएका थिए। रानाभाट बरिष्ठ नेता रामचन्द्र पौडेल निकट र थापा र श्रेष्ठ केन्द्रीय सदस्य शंकर भण्डारी निकट रहेको बताइएको छ ।
शनिबार साँझ ५ बजेसम्म सहमतिमा नेतृत्व चयन गर्ने समय दिएपनि सहमति हुन नसकेपछि साँझ निर्वाचन प्रक्रिया अगाडि बढाइएको पार्टी कार्यालयले जनाएको छ । मतदान सुरु भएको केही समयमै विवाद सिर्जना हुँदा अधिवेशन स्थागित भएको जिल्ला सचिव बिश्व बास्तोलाले बताए ।
यस्तै, छलफल नै नटुङ्गएिका कारण भिमाद नगरपालिकाको अधिवेशन पनि स्थागित हुन पुगेको सचिव बास्तोलाले बताए । ‘ऋषिङ र भिमादलाई सकेसम्म सहमतिमै नेतृत्व चयान गर्ने प्रयासमा छौं’, उनले भने, ‘सहमतिमा जान नचाहे सोमबार निर्वाचन प्रक्रियाबाट गाउँ/नगर सभापति चयान गर्ने योजना बनाइएको छ ।’
जिल्लाको शुक्लागण्डकी नगर सभापतिमा गोपिबहादुर गुरुङ, देवघाट गाउँ सभापतिमा तीलबहादुर थापा र घिरिङ गाउँ सभापतिमा यमबहादुर थापा र्सवसम्मत चयन भएका छन् ।
त्यस्तै, बन्दिपुर गाउँपालिका, आँवुखैरेनी गाउँपालिका, भानु नगरपालिका, म्याग्दे गाउँपालिका र व्यास नगरपालिकामा भने सभापति तथा अन्य पदका लागि निर्वाचन भएको थियो ।
निर्वाचनबाट बन्दिपुर गाउँ सभापतिमा कर्णबहादुर खत्री, आँवुखैरेनी गाउँ नगर सभापतिमा विष्णु पन्त, व्यास नगर सभापतिमा सूर्यचन्द्र हड्खले, म्याग्दे गाउँ सभापतिमा रामभक्त घिमिरे र भानु नगरसभापतिमा रामकुमार श्रेष्ठ निर्वाचित भएका छन् ।
