पर्यटन प्रवर्द्धनका लागि मर्स्याङ्दीमा जलविहार
भानु : नेपाल पत्रकार महासंघ तनहुँले भानु नगरपालिकाको सहयोगमा मर्स्याङ्दी नदीमा जलविहार कार्यक्रम गरेको छ । पर्यटन प्रवर्द्धन गर्ने उद्देश्यसहित शनिबार भानु नगरपालिका–३ को तुरतुरेबाट आँवुखैरेनी गाउँपालिकास्थित अकला मन्दिरसम्म जलविहार गरिएको थियो ।
मर्स्याङ्दी नदीमा जलविहारको सम्भावना रहनुका साथै यसबाट पर्यटन प्रवर्द्धन गर्न सकिने भएकाले नगरपालिकासँगको समन्वयमा जिल्लास्थित सञ्चारकर्मीलाई जलविहारको व्यवस्था मिलाइएको नेपाल पत्रकार महासंघले जनाएको छ ।
पत्रकारहरूले यस क्षेत्रमा जलविहारको सम्भावनाबारे सञ्चारमाध्यमबाट प्रचारप्रसार गर्ने भएकाले यसले भानुको पर्यटन प्रवर्द्धनमा टेवा पुग्ने विश्वासका साथ जलविहारको कार्यक्रम गरिएको महासंघ तनहुँका अध्यक्ष धनपति अधिकारीले बताए ।
जलविहारमा सहभागी पत्रकार पूर्ण विकले मर्स्याङ्दी नदी जलविहारका लागि सम्भावना बोकेको क्षेत्र भएकाले यसको प्रचारप्रसार गरी पर्यटन प्रवर्द्धन गर्न सकिने बताए ।
यस्तै, भानु–९ स्थित चितीखोला होमस्टे (घरबास)मा पर्यटन विकास तथा मर्स्याङ्दी नदीमा साहसिक जलयात्रा प्रवर्द्धन कार्यक्रम सम्बन्धी अन्तरक्रियामा भानु नगरपालिकाका प्रमुख आनन्दराज त्रिपाठीले पर्यटन प्रबर्द्धन र पर्यटकीय गन्तव्यको संरक्षणलाई नगरपालिकाले प्राथमिकता दिएको बताए ।
उलने भने, ‘पर्यटन प्रवर्द्धनका लागि सञ्चारकर्मीको महत्त्वपूर्ण भूमिका हुने र पत्रकारहरूले यस क्षेत्रको प्रचारप्रसारमा सहकार्य र समन्वय गर्नुहुनेछ ।’
