आठौं तनहुँ महोत्सव : गायक हेमन्त शर्मा र प्रीति आलेको सांगितिक प्रस्तुती
भञ्ज्याङ न्यूज
आठौं तनहुँ महोत्सवको पाँचौ दिन सोमबार कलाकार हेमन्त शर्मा र प्रीति आलेले आ-आफ्नो सांगितिक प्रस्तुतबाट दर्शकलाई मनोरञ्जन प्रदान गरेका छन् । महोत्सव स्थलमा सोमबार अमर धिताल, काजल गुरुङ, उमादेवी खनाल र रमेश मेलोडीको समेत सांगितिक प्रस्तुती रहेको थियो ।
कलाकारको प्रस्तुतिमा दर्शकहरुले गीत र नाचेर साथ दिंदा महोत्सवको माहौल छुट्टै रमाइलो बनेको थियो । महोत्सवमा चर्चित कलाकारको प्रस्तुति रहेका कारण सोमबार पनि दर्शकहरु घुइँचो लागेको कलाकार समन्वय समितिका संयोजक कुमार मल्लले बताए । यस्तै, महोत्सवको छैटौं दिन मंगलबार मिलन नेवार, कर्णराज गिरी, कृष्ण सुवेदी र सजना बास्तोला लगायतका कलाकारहरुको सांगितक प्रस्तुती रहने संयोजक मल्लले जानकारी गराए ।
महोत्सवको पाँचौं दिन ३० लाख रुपैयाँ बराबरको आर्थिक कारोबार भएको महोत्सवका प्रवक्ता इमकुमार मल्लले बताए । दर्शकहरुको ध्यानलाई मध्यनजर गर्दै मादीसेती नदीमा सञ्चालन गरिएको मोटरबोर्डको शुल्क घटाइएको छ । महोत्सवको अन्य दिनमा प्रतिव्यक्ति २५० शुल्क रहेपनि सोमबारदेखि १५० रुपैयाँ कायम गरिएको आयोजकले जनाएको छ।
दैनिक १०० जनाको हाराहारीमा दर्शकहरुले मादीसेती नदीमा मोटरबोर्डको मज्जा लिने गरेको बताइउको छ । मादीसेती नदीमा दुइ वटा मोटरबोर्ड सञ्चालन गरेपछि दर्शकहरुको आकर्षण बढेको हो । धार्मिक र साँस्कृतिक पर्यटकीयस्थलहरुको पहिचान गरी प्रबर्द्धन गर्ने उद्देश्यले महोत्सवको आयोजना गरिएको हो ।
