अरिङ्गालले चिल्दा एकजनाको मृत्यु
भञ्ज्याङ न्यूज
तनहुँको म्याग्दे गाउँपालिका-५ छाङपाटनमा अरिङ्गालले चिल्दा एकजनाको मृत्यु भएको छ । मृत्यु हुनेमा स्थानीय ३१ वर्षीय टोपबहादुर कुमाल रहेको प्रहरीले जनाएको छ ।
सिसौको रुखमा रहेको अरिङ्गालको गोला बिहीबार राती पोल्ने क्रममा कुमाल घाइते भएका थिए । उनको गण्डकी अस्पताल पोखरामा उपचारका क्रममा शनिबार मृत्यु भएको प्रहरी नायब उपरीक्षक युवराज खड्काले जानकारी दिए ।
अरिङ्गालले चिल्दा घाइते भएका कुमाललाई तत्कालै शुभलक्ष्मी पोलिक्लिनिक भिमाद हुँदै थप उपचारका लागि कास्कीको पोखरा पठाइएको थियो ।
