तनहुँको व्यास-५ स्थित चुँदेरबासीको घरघरमा खानेपानी पुग्यो

तनहुँको व्यास नगरपालिका-५ स्थित चुँदेरबासीको घरघरमा खानेपानी पुगेको छ । नगरपालिकाको दुर्गम क्षेत्रका बासिन्दा खानेपानीको समस्याबाट गुज्रिएपछि रोटरी क्लबको पहलमा चुँदेर पँधेरी खोला खानेपानी तथा सरसफाइ योजना सम्पन्न भएपछि घरघरमा खानेपानी पुगेको हो ।

रोटरी क्लब अफ होनोलुल सनसेट, व्यास नगरपालिका, व्यास नगरपालिका वडा नं. ५ र रोटरी क्लब अफ दमौलीको सहयोगमा चुँदेरमा निर्माण सम्पन्न भएको खानेपानी योजना विहीवार उद्घाटन गरी समुदायलाई हस्तान्तरण गरिएको छ । १८ महिना अघि शिलान्यास गरिएको उक्त आयोजनाको रोटरी डिष्ट्रिक ३२९२ नेपाल भुटानका निवर्तमान डिष्ट्रिक गभर्नर राजीव पोख्रेल र व्यास नगरपालिका प्रमुख बैकुण्ठ न्यौपानेले संयुक्त रुपमा उद्घाटन गरे । सोही अवसरमा प्रमुख अतिथि पोख्रेलले शिक्षा, स्वास्थ्य, खानेपानी जस्ता आधारभूत आवश्यकतालाई प्रथामिकतामा राखेर देशभर ग्लोबल ग्राण्टका परियोजना गरिएको बताए । सोही परियोजना अन्तर्गत रोटरी दमौली र रोटरी क्लब अफ होनोलुल सनसेटले चुँदेर गाँउमा पनि खानेपानी योजना सफल पारेको बताए ।

त्यस्तै नगरप्रमुख न्यौपानेले पानीकै कारण विस्थापित भएका आफन्तलाई गाँउ फर्काउन अनुरोध गर्दै नगरपालिका रोटरीसँग मिलेर चुँदेरमा थप काम गर्न इच्छुक भएको बताए । न्यौपानेले यस खानेपानी योजनालाई अष्ट ज युएसएका अध्यक्ष तथा अष्ट ज अनुसन्धान तथा विकास केन्द्र नेपाल (आरडिसी) का पूर्वअध्यक्ष डा. दुर्गादत्त पौडेलले विशेष सहयोग गरेकोमा धन्यवाद व्यक्त गरे ।

कार्यक्रममा संविधानसभा सदस्य रामचन्द्र पोख्रेलले योजना सफल पार्न सहयोग गर्ने सबैप्रति आभार व्यक्त गर्दै यसको संरक्षणमा स्थानीय आफै जुटनुपर्ने आवश्यकतामा जोड दिए । खानेपानीको अभावमा धेरै गाँउबाट विस्थापित भए, अहिले ढिलै भएपनि गाउँमा पानी आयो खुशी छौँ स्थानीय दलबहादुर रानाले भने । ‘खानेपानीको जोहो गर्न हाम्रा आमादिदि बहिनीले धेरै समय खर्चिनु परेको थियो, अब घरघरमै खानेपानी आएको छ, यसबाट हामी धेरै उत्साहित भएका छौँ’ उनले थपे ।
कार्यक्रममा इन्टरनेशनल पार्टनर रोटरी क्लब अफ होनोलुल सनसेटको तर्फबाट डा.दुर्गादत्त पौडेल, अर्जुन अर्याल र मार्क हरविन्सनले अमेरिकाबाट जुम मार्फत चुँदेर खानेपानी आयोजनाका बारेमा आ-आफ्नो धारणा राखेको रोटरी क्लब अफ दमौलीकी सचिव बिना कैनीले जानकारी दिइन् ।

कार्यक्रममा व्यास-५ का वडा अध्यक्ष मोहनकुमार श्रेष्ठ, अष्ट जका प्रतिनिधि विदुर कोइराला, परियोजनाका इन्जिनियर प्रकाश शर्मा लगायतले पनि योजनाका बारेमा धारणा राखेका थिए । कार्यक्रममा जग्गादाताहरु हेमा वाग्ले, रबि गौली र मनिषा गौलीलाई सम्मान गरिएको थियो ।

एक करोड १६ लाख ४० हजार २ सय रुपैयाँको लागतमा सम्पन्न उक्त खानेपानी आयोजनाको कुल लागत मध्ये ८४ लाख ८१ हजार ६ सय ६७ रुपैयाँ रोटरी क्लब अफ होनोलुल सेनसेटबाट प्राप्त भएको र बाकीँ ३१ लाख ५८ हजार ५ सय ४३ रुपैपाँ नगरपालिकाले सहयोग गरेको क्लबका अध्यक्ष दिनेशकुमार श्रेष्ठले जानकारी दिए । इलेक्टिक लिफटिङ प्रविधिको प्रयोग गरी ८ सय ४५ मिटर दुरीको मुहानबाट पानी ल्याई ३ वटा टयाङ्कीमा संकलन गरी प्रत्येक घरमा खानेपानी वितरण गरिएको छ । ५० घनमिटर, २० र २ घनमिटरको टयाङ्कीमा प्रत्येक एक घण्टामा १० हजार पानी संकलन हुनेछ । उक्त खानेपानी योजनाबाट चुँदेर, रानीटारी र नेपालटारका २ सय २९ घरघुरीका एक हजार एक सय ८ जना लाभान्वित हुने श्रेष्ठले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर