धरापमा परेको पौडेलको पुर्ख्यौली घर र गाउँलेको शुभकामना !

पुरानो घर भत्किएको छ । घरका काठपात लथालिंग छन् । यहाँनेर घर थियो भन्ने अस्तित्व जोगाउन एउटा कोठाको दुइ तल्ला धराप भएरै पनि ठडिएको छ । भत्किएर रहेको बाँकी भाग कुन दिन ढल्ने हो, टुंगो छैन । यो दृश्य हो नवनिर्वाचित राष्ट्रपति रामचन्द्र पौडेलको गाउँको घरको हो ।

तनहुँको व्यास नगरपालिका-८ रिस्ती स्थित बाहुनपोखरा पौडेलको गाउँ हो । २०७२ सालको विनाशकारी भूकम्प र त्यसपछि निरन्तर गएका परकम्पले पौडेलको पुरानो घर भग्नावशेषमा परिणत हुँदै गएको छ । गाउँको पुर्ख्यौली घरको नामोनिशान मेटिन लागेपछि पौडेलका छोरा चिन्तनले भत्किएको घरको माथिपट्टी नयाँ घर बनाउने तयारी गरे । जग्गा सम्याएर अघिल्लो वर्ष घर बनाउने तयारी गरे तर अहिलेसम्म घर ठडिएको छैन ।

पौडेलले आफ्नो पुर्ख्यौली थलो बस्न छोडेको करिब ३ दशक भन्दा बढि भयो । उनको पुर्ख्यौली घर भत्किसकेको छ । तर राष्ट्रिय राजनितिमा सधै चर्चामा रहिरहने पौडेलको प्रभाव गाउँमा भत्किएको छैन । पौडेल राष्ट्रपति बनेपछि व्यास नगरपालिका वडा नं. ८ रिस्ती बाहुनपोखराका उनका आफन्त र गाउँले खुशीले फुरूङ्ग बनेका छन् । छिमेकी समेत रहेकी स्थानीय दुर्गा पौडेल भन्छिन्, ‘हामीलाई खुसी लागेको छ, छिमेकी राष्ट्रपति हुँदा कसलाई खुसी लाग्दैन र, यहाँ आएको बेला भेट्ने बोलाउने, खाना खाने गर्नुहुन्थ्यो । उहाँले राष्ट्रको विकास गर्नुहुने छ भन्ने अपेक्षा छ ।’

पौडेलले चुनाव प्रचारको बेला कृषि, रोजगारी र पर्यटनको विकास गरी गाउँमै बसु बसु बनाउने कुरा दोहोर्‍याइरहन्थे । पौडेलको वचन गाउँलेले सधै सम्भिmरहन्छन् । उनको गाउँ कृषिको लागि उर्वर छ । बाहुनपोखराका प्रत्येक घरका करेसा हरिया तरकारीले हराभरा छन् । तर उत्पादित उपजलाई बजारसम्म जोड्न सकिएको छैन ।

हिउँद याममा सुख्खा गेग्रान मात्र हुने रिस्ती खोला असार-साउनको वर्षासँगै उर्लिन्छ । उर्लिएको भेलसँग पौँठेजोरी खेल्दै हत्केलामा ज्यानको बाजी राखेर चालकले सवारी तार्नुको विकल्पमा मोटरेबल पुल बन्न सकेको थिएन । पृथ्वीसुब्बा गुरुङको नेतृत्वमा रहेको गण्डकी प्रदेश सरकारले पौडेलको गाउँ जान लमजुङतर्फको बगुवा र तनहुँतर्फको बेलथुंगी जोड्ने गरी मोटरेबल पुल बनाउन बजेट विनियोजन गरेपछि अहिले त्यहाँ गाडी गुड्ने गरेका छन् ।

रिस्ती खोलामा तटवन्ध लगाउन पाए बर्खामा खेतको धान सुरक्षित हुन्थ्यो, गाउँमै तरकारी संकलन केन्द्र भईदिए स्वस्थकर उत्पादन कुहाएर फाल्नुपर्थेन भन्ने चाहना रहेको लक्ष्मी मिश्र बताउँछिन् । उनले भनिन्, ‘अब गाउँमा उत्पादन भएका कृषिउपजहरुलाई बजारीकरण गरिदिन सहयोग गरिदिए पुग्छ हामीलाई । अहिलेसम्म गाउँमा भएका विकास सबै उहाँले गर्दा नै भएको हो ।’

पौडेल राष्ट्रकै अभिभावक बनेका छन् । उनीसंग उनका गाउँलेको ठुला अपेक्षा छैनन् । स्थानीय रामनाथ पौडेलले गाउँमा समय मिलाएर आउन आग्रह गरेका छन् । उनले भने, ‘राष्ट्रपति भएको खुसीयाली गाउँलेसंग मनाईदिए पुग्छ । गाउँआईरहे हामीलाई खुसी र रमाईलो लाग्ने थियो ।’ सुशाशन र लोकतन्त्रको वकालत गर्ने पौडेलले राष्ट्रको अभिभावकको भुमिका कुशलतापुर्वक निर्वाह गर्न सकुन् भन्ने गाउँलेको शुभकामना छ ।

सेयर गर्नुहोस्

प्रतिक्रिया दिनुहोस्

सम्बन्धित खवर