तनहुँ-१ उपचुनाव : मत आ-आफ्नो पक्षमा ल्याउन उम्मेदवारहरु मतदाताको घरदैलोमा

तनहुँ निर्वाचन क्षेत्र नं. १ मा आगामी बैशाख १० गते हुने प्रतिनिधिसभा सदस्यको उपनिर्वाचनका लागि उम्मेदवारही चुनावी प्रचारप्रसार अभियानलाई तीब्रता दिएका छन् । दलका उम्मेदवारहरु आफ्नो पक्षमा मत ल्याउनका लागि मतदाताको घरदैलोमा पुग्न थालेका छन् ।

उपनिर्वाचनको मिति नजिकिएसंगै विभिन्न राजनीतिक दलका उम्मेदवारहरु अहिले मतदातालाई रिझाउन व्यस्थ देखिएका छन् । गत मंसिर ४ गते सम्पन्न संघीय निर्वाचनमा निर्वाचित नेपाली कांग्रेसका वरिष्ठ नेता रामचन्द्र पौडेल राष्ट्रपतिमा निर्वाचित भएपछि वैशाख १० गते तनहुँ-१ मा उपनिर्वाचन हुँदैछ ।

तनहुँ-१ मा हुने उपनिर्वाचनमा विभिन्न ९ वटा राजनीतिक दलका उम्मेदवारले उम्मेदवारी दर्ता गराएका छन् । तनहुँ-१ बाट प्रतिनिधि सभा सदस्यको उम्मेदवारी दिएका कांग्रेसका गोविन्द भट्टराइ यतिवेला मतदातालाई भेटघाट कार्यक्रमलाई नै तीव्रता दिएका छन् । उनले विशेषगरी ग्रामीण क्षेत्रका मतदाताको भेटघाटलाई बढाएको पार्टीका जिल्ला सचिव लक्ष्मिभक्त खनालले बताए । उनले भने, ‘शहरबजारमा भन्दा ग्रामीण क्षेत्रका मतदातालाई लक्षित गरी पहिलो चराणमा ग्रामीण क्षेत्रका मतदाताको घरदैलोमा पुगिएको छ ।’

चुनावी अभियानमा रफ्तारका साथ अगाडि बढेको उनले बताए । घरदैलो अभियान अन्तर्गत उम्मेदवार भट्टराइले शनिबार देवघाट र आइतबार र सोमबार आँबुखैरेनी र मंगलबार बन्दिपुरका मतदातालाई भेट्न तालिका बनाएका छन् । जिल्ला सचिव खनालले भने, ‘मतदाताबाट निकै सकारात्मक साथ मिलेको छ । हामीले पहिलेकै भोटलाई कायम राख्छौं र जित हाम्रो नै हुन्छ ।’

यस्तै, नेकपा एमालेका उम्मेदवार सर्वेन्द्र खनाल पनि घरदैलो कार्यक्रममै व्यस्त छन् । शुक्रबारबाट उनी बन्दिपुर र आँबुखैरेनी क्षेत्रमा घरदैलो, कोणसभा र मतदाता भेटघाट कार्यक्रममा व्यस्त थिए भने सोमबार भानु नगरपालिका केन्द्रित भएर चुनावी प्रचार अभियानमा छन् ।

ग्रामीण क्षेत्रका मतदाताहरुलाई भेटघाट र उत्साहित बनाउन शहरी क्षेत्रका मतदाताहरुलाई प्रभावित बनाएर नेकपा एमालेप्रति जनलहर पैदा गर्ने पार्टीको उद्देश्य बमोजिम घरदैलो अभियानलाई तीव्रताका साथ लागिएको पार्टीका जिल्ला सचिव राजेश्वर ढकालले बताए । उनले भने, ‘जनता माझ पुगेपछि हामी झन् उत्साहित भएका छौं । पहिलेभन्दा भोट बढाएर जित्ने योजनामा छौं ।’

यस्तै, राष्ट्रिय स्वतन्त्र पार्टीका उम्मेदवार डा. स्वर्णिम वग्ले पनि यतिबेला मत आफ्नो पक्षमा ल्याउने कसरतमा छन् । उनले शुक्रबारयता भानु, आँबुखैरेनी, देवघाट, दमौली लगायतका क्षेत्रमा घरदैलो, भेटघाट, सभा, कोणसभा गरी मतदाता माझ आफ्नो चुनावी ऐजेण्डा प्रस्तुत गरेका छन् ।

वग्लेका समर्थक विश्व बास्तोलाले अधिकांश मतदाताले परिवर्तन चाहेको हुँदा मत वग्लेलाई नै दिने गरी उत्साहित भएको बताए । उनले भने, ‘पार्टीका कार्यकर्ता नभएका भुइमान्छेबाट ९० प्रतिशत समर्थन गर्ने पाइएको छ । साथै पार्टीका कार्यकर्ताहरु पनि हामी देखिन मिल्दैन तर हामी तपाईहरुकै साथमा छौं भनेका छन् । समाग्रमा हामी उत्साहित छौं ।’

उपनिर्वाचनका लागि नेपाली कांग्रेसबाट गोविन्द भट्टराइ, नेपाल कम्युनिस्ट पार्टी (एमाले)बाट सर्वेन्द्र खनाल, राष्ट्रिय स्वतन्त्र पार्टीबाट स्वर्णिम वाग्ले मुख्य प्रतिस्पर्धीका रुपमा रहेका छन् । गत मंसिर ४ गते भएको निर्वाचनमा कांग्रेसबाट रामचन्द्र पौडेलले २५ हजार ३६१, एमालेबाट एकबहादुर रानाले १९ हजार ९८१, स्वतन्त्रबाट गोविन्दराज जोशीले ६ हजार ८८७ र राष्ट्रिय स्वतन्त्र पार्टीबाट बिकास सिग्देलले ६ हजार ४४ मत प्राप्त गरेका थिए ।

सेयर गर्नुहोस्

प्रतिक्रिया दिनुहोस्

सम्बन्धित खवर