शिद्ध गुफा भित्र बन्दिपुरको कार्यपालिका बैठक
भञ्ज्याङन्यूज
तनहुँको बन्दिपुर गाउँपालिकाले वडा नं. ४ मा रहेको शिद्ध गुफामा कार्यपालिका बैठक गरेको छ। दक्षिण एसीयाकै दोस्रो ठूलो दाबी गरिएको बिमलनगर स्थित शिद्धगुफाको प्रचार-प्रसारका लागि गाउँपालिकाले कार्यपालिका बैठक गरेको हो ।
बैठकले माघ ११ गते श्री स्वास्थानी व्रत आरम्भका दिन एक दिने शिद्धगुफा महोत्सव गर्ने निर्णय गरेको गाउँपालिकाका प्रमुख प्रशासकीय अधिकृत नवेशराज हमालले बताए ।
बन्दिपुर गाउँपालिकाको आयोजनामा सिद्धगुफा बिकास समिति, स्थानीय संघसंस्था लगायतको संयोजनमा उक्त दिन एक दिने महोत्सव गर्ने बैठकले निर्णय गरेको उनले बताए ।
महोत्सवले गुफाको प्रचार-प्रशार भई आन्तरिक तथा बाहृय पर्यटकको चहल पहल बढ्ने र स्थानीयले रोजगारी पाउनुका साथै आर्थिक उपार्जनमा टेवा पुग्ने गाउँपालिकाका अध्यक्ष सुरेन्द्र थापाले विश्वास व्यक्त गरे । उनले भने, ‘पहाडकी रानी उपनामले परिचित बन्दिपुर र आसपासका क्षेत्रमा पर्यटक भित्र्याउनु मोहत्सवको मुख्य लक्ष हो ।’
बैठकले विश्व पर्यटन दिवस सेप्टेम्बर २७ का दिन बुधबार बन्दिपुरमा पर्यटन सम्बन्धी कार्यक्रम भब्य रुपमा मनाउने निर्णय गरेको छ । त्यसैगरी जिल्लामा डेंगुको संक्रमण बढी रहेकाले जनचेतना कार्यक्रम अन्तर्गत प्रत्येक वडामा लामखुट्टेको लार्भा खोज र नष्ट गर अभियानलाई तीब्र पार्ने निर्णय गरिएको छ ।
यस्तै, बन्दिपुर अस्पतालमा रोग परीक्षण किट तत्काल खरिद गर्ने निर्णय भएको गाउँपालिकाका प्रवक्ता एवं वडा नं. १ का वडाध्यक्ष शिवकुमार श्रेष्ठले बताए । चार्डपर्वलाई मध्यनजर गर्दै बजारमा कालो बजारी, अखाद्य बस्तुको बिक्री वितरण, लगायतको कैफियत रहन सक्ने हुँदा बजार अनुगमनलाई प्रभावकारी बनाउने पनि निर्णय बैठकले गरेको उनले बताए ।
विद्यालय नर्स कार्यक्रम अन्तर्गत पालिका भित्र रहेका ९ वटै माध्यमिक विद्यालय र ३ वटा आधारभूत विद्यालयमा मासिक रुपमा एक-एक जना नर्सलाई खटाउने तथा हाललाई बन्दिपुर बजारमा कोशेली घरको स्थापनाका लागि प्रोत्साहन गर्ने निर्णय बैठकले गरेको उनले बताए ।
उक्त गुफा भित्र अघिल्लो कार्यकालको पालिकाका निवर्तमान अध्यक्ष पूर्णसिंह थापाको पालामा पनि गुफाको प्रचार-प्रशार गर्न भन्दै कार्यपालिकाको बैठक बसेको थियो।
