गण्डकी एमाले अधिवेशन : तनहुँका केदारले अध्यक्ष र विष्णुभक्तले सचिव पदमा उम्मेदवारी दिने
भञ्ज्याङन्यूज
नेकपा (एमाले) प्रथम गण्डकी प्रदेश अधिवेशनको तयारीमा जुटेको छ । प्रदेशका ८५ वटै पालिकामा प्रतिनिधि छनोटको प्रक्रिया अन्तिमचरणमा पुर्याइएको एमाले गण्डकी प्रदेश कमिटीका सचिव धनञ्जय दवाडीले जानकारी गराए ।
नौ सय बढी प्रतिनिधिले भाग लिने अधिवेशनमा तनहुँबाट दुइ जनाले अध्यक्ष र सचिव पदमा उम्मेदवारी दिने तयारी गरेका छन् । यही असोज १५ र १६ गते पोखरामा हुने अधिवेशनमा अध्यक्ष पदमा केदार सिग्देलले र सचिव पदमा विष्णुभक्त सिग्देलले उम्मेदावारी दिने भएका छन् ।
गण्डकी प्रदेश कमिटीको अध्यक्ष पदका दाबेदार केदार सिग्देल वि.सं. २०३३ सालवाट विद्यार्थी राजनीतिबाट कम्युनिष्ट आन्दोलनमा लागेका र ०३५ सालदेखि पार्टीमा काम शुरु गरेका हुन् ।
पञ्चायती व्यवस्थाको विरुद्धमा लाग्दा शिक्षण पेशावाट निष्काशित भएका सिग्देल ०४५ सालदेखि पूर्णकालिन भुमिगत कार्यकर्ता भएर पार्टीमा काम गर्दै आएका थिए ।
०३५ सालदेखि हालसम्म राजनीतिमा निरन्तर क्रियाशिल सिग्देल पार्टी र आम जनतामा सादगी, प्रष्टवक्ता र कम्युनिष्ट नेताका रुपमा चित्रित छन् । पार्टीको गाउँ कमिटी अध्यक्ष, क्षेत्रीय इन्चार्ज, जिल्ला कमिटी सदस्य, जिल्ला कमिटी कार्यलय सचिव, जिल्ला उपसचिव हुँदै निरन्तर राजनीतिमा सक्रिय सिग्देल ०६५ सालमा पार्टीको तनहुँ जिल्ला कमिटी अध्यक्षमा निर्वाचित भए ।
वि.सं. २०६५ देखि ०७८ सालसम्म २ कार्यकाल तनहुँ जिल्ला पार्टी अध्यक्षका जिम्मेवार सम्हालेका सिग्देलले ०७४ सालको संघीय निर्वाचनमा तनहुँको ४ प्रदेश निर्वाचन क्षेत्र र २ संघीय निर्वाचनमा वाम उम्मेदवारलाई जिताउन सफल बने ।
स्पष्ट अडान र विचारमा अडिग सिग्देल आदर्शको राजनीति गर्न रुचाउँछन् । नैतिक मुल्य, मान्यता र लोकतन्त्रमा जनताको आवश्यकतालाई नै सर्वोपरि ठान्ने सिग्देल २०७४ सालमा भएको तनहुँ क्षेत्र नं. २ का निर्वाचित सासंद समेत हुन् ।
सासंद भएर कुशलतापूर्वक जिम्मेवार वहन गरेका सिग्देलले आफनो निर्वाचन क्षेत्रमा विकास निर्माण र जनतासँगको सम्वन्ध प्रगाढ बनाएका छन् । राजनीति देश र जनताका सेवामा हुनुपर्ने आदर्श बोकेका सिग्देल हाल नेपाल कम्युनिष्ट पार्टी -एमाले) गण्डकी प्रदेश कमिटीका सचिवालय सदस्यको जिम्मेवारीमा छन् ।
कानुनमा स्नातक र राजनीतिशास्त्रमा स्नातोकोत्तर गरेका सिग्देल कम्युनिष्ट नेताको पर्याको रुपमा चित्रित छन् । राजनीतिमा नै जीवन समर्पण गरेका सिग्देल फुर्सदमा कृषि कर्ममा रमाउँछन् ।
लामो समय राजनैतिक परिवर्तन, त्यसको नेतृत्व र जीवननै बिताएका सिग्देल प्रदेशका अन्य जिल्लाको साथीहरुको साथ सहयोगले नेपाल कम्युनिष्ट पार्टी (एमाले) गण्डकी प्रदेशको अध्यक्ष बनेर पार्टीलाई थप सुढृढ बनाउँदै सुखी नेपाली समृद्ध नेपाल बनाउने अभियानमा लागेको बताउँछन् ।
यस्तै, नेकपा एमालेका नेता विष्णुभक्त सिग्देलले एमाले गण्डकी प्रदेश सचिव पदमा उम्मेदवारी घोषणा गरेका छन् । पोखरामा हुने प्रथम अधिवेशनमा सिग्देलले सचिव पदमा उम्मेदवारी घोषणा गरेका हुन् ।
हाल गण्डकी प्रदेश सचिवालय सदस्य रहेका सिग्देलले पार्टीमा आफ्नो भूमिकाको मूल्याकंन हुनेमा विश्वास व्यक्त गरेका छन् । एमाले तनहुँको कार्यवाहक सचिव रहिसकेका सिग्देल अनेरास्ववियुको पटक-पटक केन्द्रीय सदस्य भइसकेका छन् ।
विभिन्न उपसमिति गठन र परिचालन गरेर अधिवेशनको तयारीलाई तीव्रता दिइएको एमालेले जनाएको छ । यही असोज १५ र १६ गते हुने अधिवेशनले आगामी कार्यकालका लागि प्रदेशको नयाँ नेतृत्व चयन गर्नेछ ।
प्रदेश अध्यक्षको आकङ्क्षीमा अहिलेका अध्यक्ष नवराज शर्मा, सचिव धनञ्जय दवाडी, उपसचिव रश्मी आचार्य लगायतको नाम चर्चामा छ । केन्द्रीय सदस्यले पनि प्रदेश कमिटीको नेतृत्वमा आउने चाहना राखेर प्रतिनिधि छनोटका लागि मनोनयन दिएका छन् ।
अधिवेशनको १५ गते अमरसिंह चौरमा उद्घाटन र बन्द सत्र असोज १६ गते पोखरा सभागृहमा हुने एमाले गण्डकी सचिव दवाडीले बताए ।
