व्यास-५ पाटनमा दोस्रो पाटन महोत्सव सुरु
तनहुँको व्यास नगरपालिका-५ पाटनमा आजबाट दोस्रो पाटन खेलकुद, कृषि, व्यापार, सांस्कृतिक एवं पर्यटकीय महोत्सव सञ्चालन हुँदै छ । आजबाट कात्तिक ४ गतेसम्म पाटन युवा क्लवले उक्त महोत्सव सञ्चालन गर्न लागेको हो ।
महोत्सवको गण्डकी प्रदेशका आर्थिक मामिलामन्त्री जीतप्रकाश आलेले उद्घाटन गर्ने कार्यक्रम रहेको छ । यसअघि क्लवले विसं २०७८ मङ्सिर २४ गतेदेखि पुस ५ गतेसम्म प्रथम पाटन महोत्सवको आयोजना गरेको थियो । पाटन क्षेत्रको पर्यटकीय विकासका लागि क्लवले महोत्सव गर्न लागेको क्लवका अध्यक्ष अमरबहादुर थापाले जानकारी दिए ।
उनले भने, “पाटन पराशर ऋषिको तपोभूमि पनि हो, पर्यटकीय हिसाबले यो ठाउँको विशिष्ट महत्व छ, पर्यटकीय स्थल मानुङकोट पनि यही वडामा पर्छ । यस क्षेत्रको धार्मिक तथा पर्यटनको विकासमा टेवा पुर्याउन महोत्सवले सहयोग गर्ने विश्वास गरेका छौ ।”
१५ हजार दर्शकले अवलोकन गर्ने महोत्सवमा रु ३० लाखको कारोवार हुने अनुमान गरिएको थापाले बताए । महोत्सवमा दुइ सय वटा व्यापारिक स्टल रहनेछन् । महोत्सवमा ज्येष्ठ नागरिक र अपाङ्गता भएकालाई टिकट निःशुल्क व्यवस्था गरिएको छ ।
उक्त महोत्सवमा भलिबल प्रतियोगिता समेत आयोजना गरिनेछ । महोत्सवलाई सबै संघसंस्था, क्लवको सहयोग रहने विश्वास व्यक्त गर्दै महोत्सव सफल हुने आयोजकको भनाइ छ ।
