बन्दीपुरमा सामी कार्यक्रम अन्तर्गत चप्पल बनाउने तालिम
तनहुँको बन्दीपुर गाउँपालिका-१ बानियाटारमा चप्पल बनाउने तालिम सञ्चालन गरिएको छ । सुरक्षित आप्रवासन कार्यक्रम सामी अन्तर्गत वित्तीय साक्षरता कक्षामा सहभागीहरूलाई १ हप्ते चप्पल बनाउने तालिम सञ्चालन गरिएको हो ।
वैदेशिक रोजगारीमा रहेका घरपरिवारका सदस्यहरूलाई लक्षित गरी वित्तीय साक्षरताको २१ हप्ते कक्षा सम्पन्न पश्चात सिपमूलक तालिम प्रदान गरी स्वरोजगार बनाउने उद्देश्यले कार्यक्रम सञ्चालन गरिएको वित्तीय साक्षरता सहजकर्ता मन्सरी गुरुङले बताइन् ।
तालिममा सहभागि समूहले आफ्नै डिजाइन र ब्रान्डमा सबै मानिसले लगाउन मिल्ने हवाई चप्पल उत्पादन गर्न सक्षम भएको बानियाटार टोल विकास समूहका अध्यक्ष शिव खत्रीले बताए ।
बन्दीपुर गाउँपालिका वडा नं. १ का वडाध्यक्ष शिवकुमार श्रेष्ठको अध्यक्षतामा भएको कार्यक्रममा गाउँपालिकाका प्रमुख प्रशासकीय अधिकृत यादवराज आचार्यले सीपले मानिसलाई स्वरोजगार बनाउने हुँदा सिकेको सीपलाई उपयोग गरी आर्थिक उपार्जनमा लाग्न आग्रह गरे ।
स्वदेशमै आत्मनिर्भर बन्न सक्ने तथा विदेश जान चाहनेहरूका लागि पनि यस्ता सीपले महत्वपूर्ण भूमिका खेल्ने उनले बताए ।
सीपसँगै चप्पल बनाउने प्रविधि हस्तान्तरण गर्ने र बजार व्यवस्थापनमा पालिकाले सघाउने पालिका प्रवक्ता एवं वडा नम्बर १ का अध्यक्ष शिवकुमार श्रेष्ठले बताए
सुरक्षित आप्रवासन परियोजना सामीले वैदेशिक रोजगारीको क्षेत्रमा काम गर्दै आएका भएपनि रिटर्नी स्वयंसेवक मार्फत आ-आफ्नो क्षेत्रमा वैदेशिक रोजगारमा जान चाहने युवा र फर्किएका युवाहरूलाई सूचना, न्याय, सीप र अन्य विषयवस्तुमा यस परियोजनाले सचेतना कार्यक्रम मार्फत काम गर्दै आइरहेको छ ।
