भिमादका पूर्व मेयर थापाको निधन, आज भिमादस्थित सेती नदी किनारमा अन्त्येष्टि गरिदै
तनहुँ : तनहुँको भिमाद नगरपालिकाका पूर्वमेयर मेखबहादुर थापाको निधन भएको छ । सोमबार दिउँसो उपचारको क्रममा थापाको ५५ वर्षको उमेरमा निधन भएको हो ।
थापाको सोमवार किष्ट हस्पिटल काठमाडौंमा उपचारको क्रममा निधन भएको नेकपा एमाले भिमाद नगर कमिटीका अध्यक्ष इमानबहादुर थापाले बताए । पछिल्लो समय थापा कलेजोको समस्याबाट ग्रसित थिए ।
सोमबार मात्रै उनको कलेजो प्रत्यारोपण गर्ने चिकित्सकले तयारी गरेका थिए । छोरी निशा थापाले बुवालाई कलेजो दान दिन सहमत भएकी थिइन् । आइतबार साँझ सिकिस्त भएपछि भेन्टिलेटरमा राखेर उपचार थालिएकोमा मृत्यु भएको बताइएको छ ।
थापाको शव सोमबार राती भिमाद–२ स्थित निवासमा ल्याइएको र आज बिहान श्रद्धाञ्जलीका लागि नगरपालिकामा पार्थिव शरीरलाई राखिएको छ भने आजनै भिमादस्थित सेती नदी किनारमा अन्त्येष्टि गरिदै छ ।
यस्तै, भिमाद नगरपालिकाले संस्थापक मेयर थापाको निधनमा आज शोक विदा दिने निर्णय गरेको छ । आफ्नो कार्यकालभर नगप्रमुखको रूपमा उनले पु¥याएको योगदानका साथै भिमाद नगरपालिका र नगरवासीप्रति गरेको सेवा स्मरणीय रहेको बताउँदै शोकको यस घडीमा दिवङ्गत आत्माको चिरशान्तीको कामना सहित हार्दिक श्रद्धाञ्जली प्रकट गरिएको छ ।
शोकको दुःखद घडीमा आज नगरपालिका क्षेत्रभित्र स्थानीय सार्वजनिक विदा दिने साथै अन्तिम श्रद्धाञ्जलीका लागि बिहान ११ बजेदेखि उनको पार्थिव शरीर नगरपालिकाको प्राङ्गणमा राखिने जनाइएको छ । नगरपालिकाले सोमबार विज्ञप्ती जारी गरी जनप्रतिनिधि, कर्मचारी, शिक्षक लगायत भिमादबासी जनसमुदायलाई सो स्थानमा उपस्थित भई श्रद्धाञ्जली अर्पण गरिदिनुहुन र शवयात्रामा सहभागी भइदिनुहुन अनुरोध गरेको थियो ।
मेखबहादुर २०७४ सालमा भएको स्थानीय तहको निर्वाचनमा नेकपा एमालेबाट भीमाद नगरपालिकाको मेयरमा निर्वाचित भएका थिए । उनकी धर्मपत्नीको भोविमाया थापाको गएको फागुन २३ गते मिर्गौलाको समस्याको कारणले मृत्यु भएको थियो । पत्नी गुमाएको डेढ महिनापश्चात् मेखबहादुरको पनि निधन भएको छ । मेयर थापाका १ छोरा र १ छोरी छन् ।
थापाको निधनप्रति नेकपा एमाले गण्डकी प्रदेशका इन्चार्जसमेत रहेका किरण गुरुङले दुःख व्यक्त गरेका छन् । गण्डकी प्रदेश कमिटीका सदस्य थापाको निधनको खबरले स्तब्ध तुल्याएको उनले सामाजिक सञ्जालमा लेखेका छन् ।
