तनहुँमा चुनावको तयारी तीव्र : मतदान अधिकृत र सहायक अधिकृतलाई प्रशिक्षण

दमौली : यही फागुन २१ गते हुने प्रतिनिधिसभा सदस्य निर्वाचनका लागि तनहुँमा खटिने मतदान अधिकृत र सहायक मतदान अधिकृतहरूलाई प्रशिक्षण दिइएको छ। मुख्य निर्वाचन अधिकृतको कार्यालय (क्षेत्र नम्बर १) र निर्वाचन अधिकृतको कार्यालय (क्षेत्र नम्बर २) द्वारा छनोट गरिएका कर्मचारीलाई सोमबार र मंगलबार तालिम प्रदान गरिएको हो ।

निर्वाचन कार्यतालिकाअनुसार क्षेत्र नम्बर १ मा १५८ जना मतदान अधिकृत र १३४ जना सहायक मतदान अधिकृत तथा क्षेत्र नम्बर २ मा १५६ जना मतदान अधिकृत र सोही संख्यामा सहायक मतदान अधिकृत छनोट भएका छन् । उनीहरूलाई मतदान केन्द्र सञ्चालन, मतपत्र प्रयोग विधि, बदर मत न्यूनीकरणका उपाय, मतगणना प्रक्रिया तथा आकस्मिक व्यवस्थापन लगायतका विषयमा सैद्धान्तिक र व्यावहारिक ज्ञान दिइएको छ ।

जिल्ला निर्वाचन कार्यालयका प्रमुख विकास लम्सालले निर्वाचनलाई प्रविधिमैत्री र त्रुटिरहित बनाउन तालिमलाई विशेष प्राथमिकता दिइएको बताए। उनले भने, “निर्वाचनको सफलता मतदान केन्द्रमा खटिने कर्मचारीको कार्यदक्षतामा निर्भर गर्दछ । त्यसैले हामीले कर्मचारीहरूलाई मतदान प्रक्रियादेखि मुचुल्का तयार गर्नेसम्मका हरेक पक्षमा अभ्यस्त बनाएका छौँ ।” उनका अनुसार जिल्लाका १० वटै स्थानीय तहमा मतदाता शिक्षालाई प्रभावकारी बनाउन स्वयंसेवकसमेत परिचालन गरिसकिएको छ ।

प्रमुख जिल्ला अधिकारी शिवलाल तिवारीले निर्वाचनलाई सुरक्षित र शान्तिपूर्ण बनाउन एकीकृत सुरक्षा योजना कार्यान्वयनमा ल्याइएको जानकारी दिए । उनका अनुसार जिल्लाभर मोबाइल टोली, स्ट्राइक टोली तथा अन्य सुरक्षा निकाय परिचालन गरिनेछ ।

जिल्लामा कुल दुई लाख ५४ हजार ३९७ मतदाता कायम भएको जिल्ला निर्वाचन कार्यालयले जनाएको छ । निर्वाचनका लागि आवश्यक मतपत्र र अन्य सामग्री जिल्लामा प्राप्त भइसकेका छन् । क्षेत्र नम्बर १ को सामग्री दमौलीस्थित कार्यालयमा र क्षेत्र नम्बर २ को सामग्री दुलेगौँडामा सुरक्षित राखिएको छ । प्रतिनिधिसभा सदस्य निर्वाचनका लागि तनहुँमा कायम गरिएको १४४ वटा मतदान केन्द्र मध्य ८ वटा अति संवेदनशील, ५२ वटा संवेदनशील र ८४ वटा सामान्य रहेको सूचिमा राखिएको छ ।