तनहुँका १० वटै पालिकामा कांग्रेसको नयाँ नेतृत्व चयन
तनहुँ : नेपाली कांग्रेसको १५औं महाधिवेशनअन्तर्गत तनहुँका १० वटै स्थानीय तहमा नयाँ नेतृत्व चयन गरिएको छ । बुधबार सम्पन्न पालिका अधिवेशनबाट चार नगरपालिका र छ गाउँपालिकामा सभापतिसहित नयाँ नेतृत्व निर्वाचित गरिएको हो ।
अधिवेशनबाट व्यास नगरपालिकामा तुल्सीराम सापकोटा, शुक्लागण्डकीमा कृष्णप्रसाद रेग्मी, भानुमा राजन श्रेष्ठ र भिमाद नगरपालिकामा अर्विन श्रेष्ठ सभापतिमा निर्वाचित भएका छन् ।
त्यस्तै, ऋषिङ गाउँपालिकामा याम सारु मगर, घिरिङमा सुमन थापा मगर, म्याग्देमा नरसिं राना, बन्दीपुरमा परशुराम अधिकारी, देवघाटमा अर्जुन अधिकारी र आँबुखैरेनीमा सोम दर्लामी सभापतिमा निर्वाचित भएका छन् ।
नेपाली कांग्रेस तनहुँका सचिव लक्ष्मीभक्त खनालका अनुसार म्याग्दे र देवघाट गाउँपालिकामा मतदानमार्फत नेतृत्व चयन गरिएको हो भने बाँकी आठ पालिकामा सर्वसम्मत रूपमा नेतृत्व चयन गरिएको छ ।
अधिकांश पालिकामा सहमति र सहकार्यको वातावरण बनेकाले सर्वसम्मत नेतृत्व चयन गर्न सफलता मिलेको सचिव खनालले बताए । उनका अनुसार पालिका अधिवेशनले जिल्लामा पार्टीभित्र एकता, उत्साह र ऊर्जा थपेको छ । पालिका अधिवेशन सम्पन्न भएसँगै अब नेपाली कांग्रेस तनहुँले प्रदेश सभा क्षेत्रीय अधिवेशन तथा जिल्ला अधिवेशनको तयारीलाई तीव्रता दिएको जनाएको छ ।
