कांग्रेस व्यास नगरको प्राथमिकता : युवा नेतृत्व, विपद् सेवा र जनसंवाद
दमौली : नेपाली कांग्रेस व्यास नगर कार्यसमितिले पार्टी संगठनलाई जनतासँग जोड्ने र सामाजिक गतिविधिमा सक्रिय बनाउने लक्ष्यसहित युवा नेतृत्व विकास, विपद् व्यवस्थापन र घरदैलो जनसंवादलाई प्राथमिकतामा राखेको छ । नवनिर्वाचित व्यास नगर सभापति तुलसीराम सापकोटाले पदभार ग्रहण गरेसँगै नगर कार्यसमितिले यी तीन कार्यक्रमलाई आफ्नो प्रमुख कार्ययोजनाका रूपमा अघि सारेको हो ।
सोमबार आयोजित नगर कार्यसमितिको पदस्थापना तथा पद हस्तान्तरण कार्यक्रममा निवर्तमान सभापति सूर्यचन्द्र हड्खलेले नवनिर्वाचित सभापति सापकोटालाई पद हस्तान्तरण गरेका थिए । हड्खलेको अध्यक्षतामा भएको पहिलो चरणको कार्यक्रममा सापकोटाले पदभार ग्रहण गरेका थिए ।
नवनिर्वाचित सभापति सापकोटाको अध्यक्षतामा सम्पन्न दोस्रो चरणको कार्यक्रममा कांग्रेस केन्द्रीय सदस्य प्रकाश पन्थ प्रमुख अतिथि र केन्द्रीय सदस्य डा. जगदीशचन्द्र पोखरेल विशिष्ट अतिथिका रूपमा सहभागी थिए ।
कार्यक्रममा निवर्तमान सभापति वैकुण्ठ न्यौपानेले पार्टीको वर्तमान अवस्था, संगठनभित्रका चुनौती र समसामयिक राजनीतिक परिस्थितिबारे धारणा राखेका थिए। अन्य वक्ताहरूले पनि बदलिँदो राजनीतिक परिवेशमा पार्टी संगठनलाई प्रभावकारी बनाउन नेता–कार्यकर्ताबीच एकता, सक्रियता र जनतासँगको सम्बन्ध विस्तार आवश्यक रहेको औँल्याएका थिए ।
नवनिर्वाचित कार्यसमितिले अघि सारेका तीन कार्यक्रममध्ये ३५ वर्षमुनिका क्षेत्रीय प्रतिनिधिलाई समेटेर युवा प्रतिनिधि परिषद् गठन गर्ने योजना छ । यसबाट युवाको नेतृत्व क्षमता विकास गर्नुका साथै पार्टीका निर्णय र गतिविधिमा उनीहरूको सहभागिता बढाउने लक्ष्य राखिएको छ ।
त्यस्तै, नगरभित्र विपद्का समयमा परिचालित हुने ५० सदस्यीय युवा ¥यापिड टास्क फोर्स गठन गरिने भएको छ । नगर सभापति सापकोटाको नेतृत्व तथा समन्वयमा रहने टोलीले बाढी, पहिरो र आगलागीजस्ता विपद्का बेला उद्धार, राहत तथा मानवीय सेवामा सहयोग गर्नेछ । राजनीतिक आस्थाभन्दा माथि उठेर मानवीय सेवामा परिचालित हुने गरी टोलीको अवधारणा अघि सारिएको कार्यसमितिले जनाएको छ ।
यसैगरी, Úसंवादमा कांग्रेसÚ अभियानअन्तर्गत नगरका सबै वडाका टोल तथा घरघरमा पुगेर नागरिकसँग प्रत्यक्ष संवाद गरिने भएको छ । पार्टीका सक्रिय सदस्यसँगै निष्क्रिय रहेका तथा पार्टीबाट टाढिएका नेता–कार्यकर्तालाई पुनः संगठनमा जोड्ने र स्थानीय नागरिकका सुझाव, गुनासा तथा अपेक्षा सुन्ने अभियानको उद्देश्य छ ।
पदस्थापना कार्यक्रममा सहभागी नेताहरूले पार्टीलाई समयानुकूल रूपान्तरण गर्दै संगठन विस्तार र जनविश्वास अभिवृद्धिमा ध्यान दिनुपर्ने बताएका थिए । कार्यक्रममा महाधिवेशन प्रतिनिधि, क्षेत्रीय प्रतिनिधि, पार्टीका नेता तथा कार्यकर्ताको सहभागिता रहेको थियो । नगर कार्यसमितिका सचिव गौरव पन्थले सञ्चालन गरेको कार्यक्रम चियापानसहित सम्पन्न भएको थियो ।
