व्यास–६ का १३ टोललाई घाँस काट्ने मेसिन
दमौली : तनहुँको व्यास नगरपालिका–६ ले वडाभित्रका १३ वटा टोललाई घाँस काट्ने मेसिन वितरण गरेको छ । वडाले प्रत्येक टोललाई एक–एक वटाका दरले १३ वटा मेसिन उपलब्ध गराएको हो ।
वडाध्यक्ष कुमार गुरुङका अनुसार स्थानीयस्तरमा घाँस काट्ने, कृषि उपज भित्र्याउने तथा सार्वजनिक स्थल र बाटोघाटो सरसफाइमा सहजता ल्याउने उद्देश्यले टोलहरूलाई मेसिन वितरण गरिएको हो । करिब २८ हजार रुपैयाँ मूल्य पर्ने मेसिन टोलस्तरबाट सामूहिक रूपमा प्रयोग गर्न सकिने भएकाले यसको उपयोगिता बढी हुने वडाको अपेक्षा छ ।
परम्परागत रूपमा घाँस काट्न तथा कृषि उपज भित्र्याउन बढी समय र श्रम खर्चिनुपर्ने अवस्थालाई मेसिनको प्रयोगले कम गर्ने वडाध्यक्ष गुरुङले बताए । उनका अनुसार मेसिन घाँस काट्न मात्र नभई धान काट्नसमेत प्रयोग गर्न सकिन्छ ।
‘घाँस काट्ने मात्रै नभई धान काट्न पनि मिल्छ । दसैंका बेला टोल तथा गाउँका बाटो सरसफाइ गर्न पनि यसको प्रयोग गर्न सकिन्’, वडाध्यक्ष गुरुङले भने ।
वडाले टोलको आवश्यकता र प्राथमिकताका आधारमा मेसिन सञ्चालन गर्ने व्यवस्था मिलाएको छ। एउटै टोलका व्यक्तिले व्यक्तिगत प्रयोजनमा मात्र नभई सामूहिक काममा प्रयोग गर्न सक्ने भएकाले यसबाट स्थानीय श्रम र समय दुवै बचत हुने अपेक्षा गरिएको छ ।
विशेषगरी ग्रामीण क्षेत्रमा पशुपालनका लागि आवश्यक घाँस काट्ने काममा मेसिन उपयोगी हुने वडाको विश्वास छ । त्यसैगरी धान काट्ने समयमा कृषि मजदुरको अभाव वा श्रम खर्च बढ्ने अवस्थालाई समेत मेसिनको प्रयोगले केही सहज बनाउने अपेक्षा गरिएको छ ।
दसैंलगायत चाडपर्वका समयमा गाउँका बाटो, चौतारा तथा सार्वजनिक स्थल सरसफाइ गर्नसमेत मेसिन प्रयोग गर्न सकिने भएकाले यसको उपयोग कृषि क्षेत्रभन्दा बाहिर पनि हुने वडाले जनाएको छ ।
टोलमा उपलब्ध मेसिनलाई आवश्यकताअनुसार परिचालन गरी सामूहिक काममा प्रयोग गर्ने हो भने सीमित स्रोतबाट धेरै स्थानीय लाभान्वित हुन सक्ने देखिन्छ । वडाले वितरण गरेका मेसिनको नियमित मर्मतसम्भार र व्यवस्थित प्रयोग गर्न सके कृषि श्रम घटाउनुका साथै टोलस्तरका सार्वजनिक काममा समेत स्थानीयको सहभागिता बढाउन सकिने अपेक्षा गरिएको छ ।
वडाले कृषि तथा दैनिक जीवनसँग जोडिएका श्रमसाध्य कामलाई प्रविधिसँग जोड्दै स्थानीयलाई सहज बनाउने उद्देश्यले मेसिन वितरण गरेको जनाएको छ । टोललाई हस्तान्तरण गरिएका मेसिनको प्रभावकारी सञ्चालन र सामूहिक उपयोगले यसको वास्तविक लाभ निर्धारण गर्नेछ ।
