मुख्यमन्त्री नवप्रवर्तन साझेदारी कार्यक्रम : व्यासको बेनीकोटलाई उद्यमशीलतायुक्त सांस्कृतिक गाउँ बनाइने

दमौली : तनहुँको व्यास नगरपालिका–१३ स्थित बेनीकोट भञ्ज्याङ र छापडाँडा क्षेत्रलाई उद्यमशीलतायुक्त सांस्कृतिक गाउँका रूपमा विकास गरिने भएको छ । कृषि तथा पर्यटन प्रवर्द्धनमार्फत स्थानीयस्तरमा उद्यमशीलता विकास गरी गाउँको आर्थिक तथा सांस्कृतिक पहिचान स्थापित गर्ने उद्देश्यले डेढ करोड रुपैयाँ लागतको परियोजना सञ्चालन गर्न लागिएको हो ।

गण्डकी प्रदेश सरकारको मुख्यमन्त्री नवप्रवर्तन साझेदारी कार्यक्रमअन्तर्गत सञ्चालन हुने ‘उद्यमशीलतायुक्त सांस्कृतिक गाउँ बेनीकोट’ परियोजनाको मंगलबार व्यास नगरपालिका–१३ बेनीकोट भञ्ज्याङ, छापडाँडामा अभिमुखीकरण कार्यक्रम गरिएको छ ।

कार्यक्रममा व्यास नगरप्रमुख बैकुण्ठ न्यौपानेले स्थानीय स्रोत, साधन, सीप र सम्भावनाको सदुपयोग गरेर गाउँमै रोजगारी तथा आम्दानीका अवसर सिर्जना गर्नुपर्नेमा जोड दिए । उनले विकासका योजना कागजमा सीमित नभई स्थानीयको सक्रिय सहभागिताबाट व्यवहारमा देखिनुपर्ने उल्लेख गर्दै बेनीकोटलाई कृषि, संस्कृति र पर्यटनको आकर्षक गन्तव्यका रूपमा विकास गर्नुपर्नेमा जोड दिए । कार्यक्रममा उपप्रमुख इन्दिरा दरैले स्थानीय कला, संस्कृति, मौलिक पहिचान र परम्परागत पेसाको संरक्षणसँगै महिलासहित स्थानीय समुदायलाई उद्यमशीलतामा जोड्नुपर्नेमा जोड दिइन् ।

प्रमुख प्रशासकीय अधिकृत सुकदेव लम्सालले परियोजनाको प्रभावकारी कार्यान्वयन, पारदर्शिता र उपलब्धिको दिगोपनमा स्थानीयको अपनत्व तथा सक्रिय सहभागिता भएमात्र यो कार्यक्रम प्रभावकारी बन्ने बताए ।

परियोजनाअन्तर्गत पर्यटन प्रवर्द्धनका लागि होमस्टेको स्तरीकरण, आतिथ्यता विकास, मौलिक कला–संस्कृतिको संरक्षण, संग्रहालय व्यवस्थापन, मगर समुदायको पहिचान तथा भेषभूषाको प्रवर्द्धन, प्रचारप्रसार र सरसफाइका कार्यक्रम सञ्चालन गरिने प्रमुख प्रशासकीय अधिकृत लम्सालले जानकारी गराए ।

उनका अनुसार कार्यक्रम अन्तर्गत ड्रागन फ्रुट खेती विस्तार, रैथाने बाली संरक्षण तथा सिँचाइ व्यवस्थापनमा पनि लगानी गरिनेछ । २०८४ जेठ ३० गतेसम्म सञ्चालन हुने परियोजनाले बेनीकोटको आर्थिक, सामाजिक तथा पर्यटकीय सम्भावनालाई उजागर गर्ने अपेक्षा गरिएको छ । कार्यक्रममा व्यास नगरपालिकाका विभिन्न वडाका अध्यक्ष, शाखा प्रमुख, कर्मचारी तथा स्थानीय बासिन्दाको सहभागिता रहेको थियो ।

परियोजनामा गण्डकी प्रदेश सरकार र व्यास नगरपालिकाको साझेदारी रहनेछ। कुल एक करोड ५० लाख रुपैयाँ लागत अनुमान गरिएको परियोजनामा प्रदेश सरकारले ७५ प्रतिशत अर्थात् एक करोड १२ लाख ५० हजार रुपैयाँ र व्यास नगरपालिकाले २५ प्रतिशत अर्थात् ३७ लाख ५० हजार रुपैयाँ व्यहोर्नेछन् ।

परियोजना २०८३ मंसिर १६ गतेदेखि २०८४ वैशाख ३० गतेसम्म सञ्चालन गर्ने कार्ययोजना छ । परियोजनाले पूर्वाधार निर्माण, उद्यमशीलता विकास, पर्यटन प्रवर्द्धन, कृषि विकास तथा अन्य विविध कार्यक्रमलाई प्राथमिकतामा राखेको छ । परियोजनाअन्तर्गत २५ प्रतिशत बजेट पूर्वाधार निर्माणमा खर्च गरिनेछ । यसअन्तर्गत स्टोन ट्रेल निर्माण, पाहुना घर निर्माण तथा कालो सुँगुरको खोर व्यवस्थापन र प्रवर्द्धनका कार्यक्रम सञ्चालन गरिनेछ ।

त्यसैगरी, उद्यमशीलता विकासतर्फ २५ प्रतिशत बजेट विनियोजन गरिएको छ । सामुदायिक वनमा बाँसखेती विस्तार, भुजेल समुदायको परम्परागत पेसा संरक्षण, बाँसका हस्तकलाका सामग्री निर्माण तथा दलित समुदायको परम्परागत पेसा संरक्षण र प्रवर्द्धनसँगै व्यावसायिक मौरीपालनलाई अघि बढाइने परियोजनामा उल्लेख छ ।

पर्यटन प्रवर्द्धनका लागि पनि २५ प्रतिशत बजेट छुट्याइएको छ । यसअन्तर्गत अतिथिसत्कार, होमस्टेको स्तरीकरण, मौलिक कला तथा संस्कृतिको संरक्षण, संग्रहालय व्यवस्थापन, मगर पहिचान र भेषभूषाको संरक्षण, प्रचारप्रसार तथा सरसफाइका कार्यक्रम सञ्चालन गरिनेछन् ।

कृषि विकासतर्फ १५ प्रतिशत बजेट खर्च गरिनेछ । ड्रागन खेती विस्तार, स्थानीय रैथाने बालीको संरक्षण तथा सिँचाइ व्यवस्थापनलाई प्राथमिकता दिइएको छ । बाँकी १० प्रतिशत बजेट अध्ययन, अनुगमन, लेखापरीक्षण, प्याकेजिङ, अभिमुखीकरण तथा परामर्शलगायत विविध कार्यक्रमका लागि उपयोग गरिनेछ ।

व्यास नगरपालिकाको आयोजना तथा गण्डकी प्रदेश सरकारको साझेदारीमा सञ्चालन हुने परियोजनाले बेनीकोट क्षेत्रको मौलिक संस्कृति, स्थानीय सीप, कृषि उत्पादन र पर्यटकीय सम्भावनालाई एकीकृत रूपमा प्रवर्द्धन गर्ने लक्ष्य राखेको छ । कृषि र पर्यटनलाई स्थानीय उद्यमसँग जोड्दै समुदायको आर्थिक गतिविधि विस्तार गर्नु परियोजनाको मुख्य उद्देश्य देखिन्छ ।

Adertisement

सेयर गर्नुहोस्



प्रतिक्रिया दिनुहोस्



सम्बन्धित खवर

सम्बन्धित खवर

Leave a Reply

Your email address will not be published.

Back to top button
You cannot copy content of this page.
Close

Ad Blocker Detect

Please consider supporting us by disabling your ad blocker