भिमादको डुम्रीबेँसीमा मङ्सिरे चटारो, धानदेखि घ्यूसम्मको मूल्य सार्वजनिक

भिमाद : तनहुँको भिमाद नगरपालिका–१ डुम्रीबेँसीमा यतिबेला मङ्सिरे चटारो सुरु भएको छ । धान काट्ने, झार्ने र पराल थन्क्याउनेदेखि खेतबारी खनजोत गर्ने काममा किसान व्यस्त हुन थालेका छन् । यसैबीच स्थानीयस्तरमा कृषि उपज, कृषि औजार, श्रम तथा दैनिक उपभोग्य वस्तुको दरभाउ समेत सार्वजनिक गरिएको छ । ‘मेहनती बनौँ, खेतबारी बाँझो नराखौँ’ भन्ने सन्देशसहित सार्वजनिक गरिएको दरभाउमा धान, पराल, मल, कृषि श्रम तथा स्थानीय उत्पादनको मूल्य उल्लेख गरिएको छ ।

निर्धारित दरअनुसार सावित्री धानको मूल्य प्रतिमुरी दुई हजार ६०० रुपैयाँ र वार धानको मूल्य प्रतिमुरी दुई हजार ९०० रुपैयाँ तोकिएको स्थानीय कृषक दयाराम श्रेष्ठले जानकारी गराए । उनका अनुसार परालको मूल्य प्रतिभारी १५० रुपैयाँ निर्धारण गरिएको छ भने आफैँले भारी बाँधेर लैजानेका लागि प्रतिभारी १०० रुपैयाँ पर्नेछ ।

कृषि कार्यका लागि थ्रेसर प्रयोग गर्दा प्रतिमिनेट ५० रुपैयाँ र मिनीट्याक्टरबाट खेतबारी जोत्दा प्रतिघण्टा एक हजार रुपैयाँ लाग्नेछ । हँसिया, कोदालो र बन्चरो अर्जापेको प्रतिपिस ६० देखि ८० रुपैयाँ तथा खेताला ज्याला प्रतिघण्टा १०० रुपैयाँ तोकिएको कृषक श्रेष्ठले जानकारी गराए । बाँध तथा कुलोमा निमेक गर्दा प्रतिदिन ४०० रुपैयाँ ज्याला निर्धारण गरिएको छ ।

त्यसैगरी गोठे मल प्रति डोको ८० रुपैयाँ र युरिया मल प्रतिबोरा एक हजार ३०० रुपैयाँ कायम गरिएको छ । स्थानीय उत्पादनतर्फ भैँसीको घ्यू र पकाएको चुक प्रतिमाना एक हजार रुपैयाँ, शुद्ध अर्गानिक मह प्रतिमाना एक हजार २०० रुपैयाँ तथा एभोकाडो प्रतिकिलो २५० रुपैयाँ मूल्य निर्धारण गरिएको उनले जानकारी गराए ।

स्थानीयस्तरमै कृषि उपज र श्रमको दरभाउ सार्वजनिक हुनुले किसान तथा उपभोक्तालाई कारोबारमा सहज हुने अपेक्षा गरिएको छ । खेतबारी बाँझो नराखी कृषि उत्पादनमा सक्रिय हुन र स्थानीय उत्पादनको बजारीकरणलाई प्रोत्साहन गर्न यो मूल्य सूचि सार्वजनिक गरिएको कृषक श्रेष्ठले जानकारी गराए ।

Adertisement

सेयर गर्नुहोस्



प्रतिक्रिया दिनुहोस्



सम्बन्धित खवर

सम्बन्धित खवर

Leave a Reply

Your email address will not be published.

Back to top button
You cannot copy content of this page.
Close

Ad Blocker Detect

Please consider supporting us by disabling your ad blocker