व्यास नगरपालिकाले सञ्चालन गरेको निःशुल्क शिविरमा ७८५ जनाको आँखा परीक्षण
- भञ्ज्याङ समाचारदाता (दमौली)
तनहुँको व्यास नगरपालिका निःशुल्क आँखा परीक्षण शिविर आयोजना गरी ७८५ जना ज्येष्ठ नागरिकको आँखा परीक्षण गरेको छ । नगरपालिकाले गत मंगलबारबाट सञ्चालन गरेको चार दिने शिविरका क्रममा सबै वडाबाट ज्येष्ठ नागरिक आँखा जाँचका लागि आएका थिए । अन्तिम दिन शुक्रबार मात्र झण्डै दुइ सय ज्येष्ठ नागरिकले आँखा परीक्षण गराएका थिए ।
नगरपालिकाको शिविरमा औषधी तथा चस्मासमेत निःशुल्क पाइने भएकाले विभिन्न ठाउँबाट ज्येष्ठ नागरिक उपचारका लागि आएका थिए । त्यसक्रममा ६३ जना मोतियाबिन्दुका बिरामी भेटिएको नगरपालिकाका प्रमुख प्रशासकीय अधिकृत डिल्लीराम सिग्देलले बताए । नगरपालिकाले उनीहरु सबैलाई आईतबार अपरेशन शुल्क र खर्च समेत दिएर शल्यक्रियाका लागि पठाउने प्रमुख प्रशासकीय अधिकृत सिग्देलले जानकारी दिए । शिविरमा हिमालय आँखा अस्पतालका चिकित्सक डा. धर्मेन्द्र घोरासैनी नेतृत्वको टोली आँखा परीक्षण शिविरमा खटि्टएको थियो ।
