दमौली अस्पताललाई जग्गा व्यवस्थापनमा व्यास नगरपालिकाले पहल गरिने

व्यास नगरपालिकाले दमौली अस्पताललाई आवश्यक पर्ने जग्गा व्यवस्थापनमा पहल गर्ने भएको छ । नगरकार्यपालिकाको मंगलबार बसेको नियमित बैठकले अस्पताल व्यवस्थापनका लागि सिमाना जोडिएको जिल्ला कृषि ज्ञान केन्द्रको जग्गा, भवन दमौली अस्पताललाई उपलब्ध गराउन पहल गर्ने निर्णय गरेको छ ।

नगर प्रमुख बैकुण्ठ न्यौपानको अध्यक्षतामा बसेको बैठकले कृषि ज्ञान केन्द्रलाई अन्यत्र व्यवस्थापन गरी उक्त कार्यालयको स्वमित्वमा रहेको जग्गा दमौली अस्पताललाई उपलब्ध गराइदिन गण्डकी प्रदेश सरकारसंग अनुरोध गर्ने निर्णय गरेको छ ।

यस्तै बैठकमा आन्तरिक कर्मचारी सेवा सुविधा सम्बन्धमा कार्यविधि संशोधन गर्न विद्यमान समितिलाई जिम्मा दिने निर्णय गरेको छ । निम्बस फाउन्डेसन बिराटनगरसंग व्यास-१० दुम्सी बजारमा नगर अस्पतालको पुर्वाधार एवं आवश्यक उपकरणका लागि वजेट व्यवस्थापन गरिदिन अनुरोध गर्ने पनि बैठकले निर्णय गरेको बताइएको छ ।

बैठकमा विपद् व्यवस्थापन सम्बन्धमा समिक्षा गर्दै गत वर्षदेखि नै घर निर्माण गर्न बाँकी लाभग्राहीको घर निर्माण प्रकृयाका लागि जिल्ला विपद् व्यवस्थापन समितिसँग पहल गर्ने भएको छ । यस्तै, वन ऐन, २०७५ को दफा २२ (१) बमोजिम व्यास नगरपालिका भित्रका सामुदायीक वन उपभोक्ता समितिसंग आ.ब २०७७/०७८ र २०७८/०७९ को वार्षिक कार्ययोजना एवं आयव्यय अभिलेख माग गर्ने बैठकले निर्णय गरेको प्रवक्ता एवं वडाअध्यक्ष मोहन कुमार श्रेष्ठले जानकारी गराए । बैठकले नेपाली महिलाहरुको महानपूर्व हरितालिका तिजको अवसरमा भादौ २४ गते व्यास नगरपालिका अन्तरगतका कार्यालयहरुमा सार्वजनिक बिदा दिने निर्णय गरेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर