बन्दीपुरको कपडा बैंकमा ३५ किलो पुनःप्रयोग गर्न मिल्ने कपडा सहयोग
डुम्रे : तनहुँको बन्दीपुर गाउँपालिका–१ नाहाला घर भई हाल आँबुखैरेनी गाउँपालिका–३ आँबुखैरेनी निवासी मदन खत्रीले वडा कार्यालयद्वारा सञ्चालित कपडा बैंकलाई करिब ३५ किलो पुनःप्रयोग गर्न मिल्ने कपडा सहयोग गरेका छन् ।
खत्रीले शर्ट, पेन्ट, टी–सर्ट, साडी, टोपी लगायत बालबालिकाका कपडासमेत कपडा बैंकमा उपलब्ध गराएका हुन् । प्रयोग गर्न मिल्ने कपडालाई पुनःप्रयोगमा ल्याउने र आवश्यक पर्ने व्यक्तिलाई उपलब्ध गराउने उद्देश्यले सञ्चालित कपडा बैंकमा खत्री परिवारले गरेको सहयोगप्रति वडा कार्यालयले धन्यवाद व्यक्त गरेको छ ।
वडा कार्यालयले घरमा प्रयोगमा नआएका तर पुनःप्रयोग गर्न सकिने कपडा भए कपडा बैंकमा उपलब्ध गराउन स्थानीयवासीलाई आग्रह गरेको छ । यसबाट कपडाको पुनःप्रयोगलाई प्रोत्साहन गर्नुका साथै आर्थिक रूपमा विपन्न तथा आवश्यकतामा रहेका व्यक्तिलाई सहयोग पुग्ने बन्दीपुर–१ का वडा अध्यक्ष शिवकुमार श्रेष्ठले बताए ।
कपडा बैंकमा कपडा सहयोग गर्न इच्छुक नागरिकले वडा नम्बर १ को कार्यालयमा सम्पर्क गर्न सक्ने उनले बताए ।
