नेपाल विद्युत प्राधिकरण तनहुँले गत वर्ष ८७ करोड ७६ लाख युनिट विद्युत् बिक्री गर्यो

तनहुँ : नेपाल विद्युत् प्राधिकरण तनहुँ वितरण केन्द्रले आर्थिक वर्ष २०८२/८३ मा जिल्लाका विभिन्न क्षेत्रमा एक हजार ८९५ घरधुरीमा विद्युत् सेवा विस्तार गरेको छ । विद्युत् सुविधा नपुगेका क्षेत्र तथा नयाँ बस्तीलाई लक्षित गरी लाइन विस्तार गरिएसँगै जिल्लामा राष्ट्रिय प्रसारण प्रणालीको पहुँच थप विस्तार भएको हो ।

वितरण केन्द्रका इन्जिनियर डिलबहादुर आलेका अनुसार विद्युत् पहुँच विस्तारलाई प्राथमिकता दिँदै ग्रामीण तथा दुर्गम क्षेत्रमा रहेका घरधुरीलाई समेत राष्ट्रिय प्रसारण प्रणालीमा जोड्ने कामलाई निरन्तरता दिइएको छ । नयाँ घरधुरीमा सेवा विस्तार भएपछि तनहुँ वितरण केन्द्रअन्तर्गत विद्युत् ग्राहकको संख्या ८२ हजार २४९ पुगेको छ ।

केन्द्रका अनुसार दमौली कार्यालयअन्तर्गत २८ हजार ८२९, खैरेनीटार उपवितरण केन्द्रअन्तर्गत २७ हजार ४१७, डुम्रे शाखाअन्तर्गत १२ हजार १५६, आँबुखैरेनी शाखा अन्तर्गत पाँच हजार ९२०, थर्पु नोलाइटअन्तर्गत दुई हजार ६१५ र दुईपिप्ले नोलाइटअन्तर्गत पाँच हजार ३१२ ग्राहक रहेका छन् ।

तनहुँ वितरण केन्द्रले तनहुँ जिल्लाका १० वटै स्थानीय तहलाई आफ्नो कार्यक्षेत्रमा समेटेको छ । तनहुँबाहेक कास्कीको रुपा गाउँपालिका–३ र ४ का केही भाग, लमजुङको मध्यनेपाल नगरपालिका–१ देखि ५ सम्मका क्षेत्र तथा नवलपुरका बौदीकाली र बुलिङटार गाउँपालिकाका केही भागमा समेत यही वितरण केन्द्रमार्फत विद्युत् सेवा प्रवाह हुँदै आएको इन्जिनियर आलेले बताए ।

विद्युत् पहुँच विस्तारसँगै केन्द्रले विद्युत् आपूर्तिलाई भरपर्दो र गुणस्तरीय बनाउनेतर्फ समेत काम गरिरहेको जनाएको छ । विद्युत् पुगेका नयाँ बस्तीमा घरायसी प्रयोजनसँगै कृषि, व्यवसाय, साना उद्योग तथा स्थानीय उत्पादनमूलक गतिविधि विस्तारमा समेत सहयोग पुग्ने अपेक्षा गरिएको छ ।

एक वर्षमा एक अर्बभन्दा बढीको विद्युत् बिक्री

तनहुँ वितरण केन्द्रले आर्थिक वर्ष २०८२/८३ मा ८७ करोड ७६ लाख १३ हजार ७८७ युनिट विद्युत् बिक्री गरेको छ । उक्त विद्युत् बिक्रीबाट केन्द्रले एक अर्ब एक करोड ११ लाख १२ हजार १२६ रुपैयाँ संकलन गरेको जनाएको छ । विद्युत् खपत तथा ग्राहक संख्या बढ्दै जाँदा वितरण केन्द्रको सेवा क्षेत्र पनि विस्तार हुँदै गएको छ । नयाँ घरधुरीलाई विद्युत् पहुँचमा ल्याउनुका साथै विद्यमान ग्राहकलाई नियमित, भरपर्दो र गुणस्तरीय विद्युत् उपलब्ध गराउने चुनौतीसमेत केन्द्रसामु रहेको छ ।

केन्द्रअन्तर्गत हाल छ वटा सबस्टेसन, ३० वटा ११ केभी फिडर, १०७ किलोमिटर ३३ केभी प्रसारण लाइन, ९३९ किलोमिटर ११ केभी लाइन र चार हजार ३२८ किलोमिटर ०.४/०.२३ केभी वितरण लाइन रहेका छन् । त्यस्तै विभिन्न क्षमताका ६७३ वटा ट्रान्सफर्मरमार्फत विद्युत् वितरण भइरहेको छ ।

वितरण प्रणालीलाई थप व्यवस्थित र प्रभावकारी बनाउन ११/०.४ केभी लाइन विस्तार, मर्मत तथा सम्भार, सुदृढीकरण र अपग्रेडिङको कामसमेत भइरहेको केन्द्रले जनाएको छ । आवश्यकता अनुसार विभिन्न क्षमताका लोड सेन्टर थप गर्ने तथा पुराना संरचनालाई स्तरोन्नति गर्ने कामलाई पनि प्राथमिकता दिइएको छ ।

त्यसैगरी नयाँ ग्राहकका लागि मिटर जडान, मिटरसम्बन्धी गुनासो व्यवस्थापन तथा विद्युत् आपूर्तिसँग सम्बन्धित अन्य सेवासमेत केन्द्रबाट प्रदान हुँदै आएको छ ।

ग्रामीण तथा दुर्गम क्षेत्रमा विद्युत् पहुँच विस्तार हुँदै जाँदा जिल्लामा विद्युत् खपतको दायरा पनि फराकिलो बन्दै गएको छ । विद्युत् सेवा केवल उज्यालोका लागि मात्र नभई कृषि आधुनिकीकरण, व्यवसाय सञ्चालन, घरेलु तथा साना उद्योगको विकास र स्थानीय रोजगारी सिर्जनासँग जोडिन थालेकाले बाँकी विद्युत् पहुँचविहीन बस्तीलाई समेत राष्ट्रिय प्रसारण प्रणालीमा जोड्नु अबको महत्वपूर्ण आवश्यकता बनेको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर