एमसीसीको विरोधमा सिठ्ठी जुलुश
भञ्ज्याङ समाचारदाता/दमौली
अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) सम्झौतालाई लिएर अहिले देशभर विरोध प्रदर्शन भइरहेको छ । देशलाई घाटा पुग्ने गरी एमसीसी सम्झौता गर्न लागेको भन्दै नेत्रविक्रम चन्द नेतृत्वको नेकपाका कार्यकर्ताले दमौलीमा प्रदर्शन गरेका छन्। पार्टीका तर्फबाट बजारमा सिठ्ठी जुलुश तथा सभा गरिएको थियो ।
दमौली अनशन चौतारीमा गरिएको सभामा नेता डम्बर विकले देशको अहित हुने सम्झौता सत्ताधारी र विपक्षीसमेत मिलेर हुन लागेको भन्दै यसको विरोध गरिएको बताए । एमसीसी सम्झौता राष्ट्रघाती भएको भन्दै संसदबाट अनुमोदन नगरी खारेज गर्न र राष्ट्रिय सार्वभौमिकताको रक्षा गर्न माग गर्दै प्रदर्शन गरेको बताइएको छ । उनीहरुले विरोधमा एमसीसी चाहिँदैन, देश बेच्न पाइँदैन, नो एमसीसी लगायत विभिन्न नारा लेखिएको प्लेकार्ड बोकेका थिए भने सिठ्ठी बजाउदै विरोध गरी दमौली बजार परिक्रमा गरेका थिए ।
