एमसीसीको विरोधमा तनहुँका युवा सडकमा उत्रने
भञ्ज्याङ समाचारदाता/दमौली
अमेरिकी सहयोग परियोजना मिलेनियम च्यालेन्ज कर्पोरेसन (एमसीसी)को विरोधमा तनहुँका युवाहरु सडकमा उत्रने भएका छन् । जताततै एमसीसी सम्झौताको बिरोध भइरहेको बेला राष्ट्रप्रेमी नेपाली युवा समूह, क्लब सञ्जाल व्यास नगरपालिकाले मोटरसाइकल र्याली गर्ने जनाएको छ ।
विरोध कार्यक्रम बारे बुधवार दमौलीमा पत्रकार सम्मेलन गरी असोज १ गते दमौलीमा ४ सय भन्दा बढी मोटरसाइकलको सहभागीतामा विरोध र्याली प्रदर्शन गर्ने व्यवसायी मित्र दुराले बताए । एमसीसी नेपाल र नेपाली जनताको हित विपरीत रहेको भन्दै दुराले यसको विरुद्धमा सबै राष्ट्रप्रेमी जनता एकजुट हुनुपर्ने बताए । बिकासको बहानामा देश बेच्ने षड्यन्त्र भइरहेकाले स्थानीय तहबाट यसको सहमति नहोस् भन्नका लागि खबरदारी गर्न बिरोधका कार्यक्रम गर्न लागिएको उनले बताए ।
नेपालको संविधानमा नियन्त्रण गरी अमेरिकी डिजाइनको राज्य सञ्चालन प्रणाली लाद्ने प्रयास भइरहेको आरोप लगाउँदै उनले यो अमेरिकाको सियो बनेर पस्ने र हात्ती बनेर निस्कीने योजना भएको बताए । साथै दुराले नेपाललाई प्रयोग गरी तेस्रो विश्व युद्ध निम्त्याउने तयारी भइरहेको भन्दै एमसीसी सम्झौता खारेज नहुँदासम्म निरन्तर विरोधका कार्यक्रमहरु गर्ने बताए ।
