छुट्टाछुट्टै सडक दुर्घटनामा २ जनाको मृत्यु, १० जना घाइते
पृथ्वीराजमार्गको तनहुँ खण्डमा सोमबार र मंगलबार भएका छुट्टाछुट्टै सडक दुर्घटनामा दुइ जनाको मृत्यु भएको छ भने १० जना घाइते भएका छन् । व्यास नगरपालिका-१२ देउरालीमा सोमबार राती भएको दुर्घटनामा दुइ जनाको मृत्यु भएको छ ।
मृत्यु हुनेमा व्यास-५ बस्ने अनिल बाचे मगर र विकास विक रहेको जिल्ला प्रहरी कार्यालय तनहुँले जनाएको छ । लु१ख ९८३२ नम्बरको ट्रकसंग ग१८प ९२२५ नम्बरको मोटर साइकललाई ठक्कर खाँदा मोटरसाइकलमा सवार दुबै जनाको घटनास्थलमा मृत्यु भएको प्रहरी नायब उपरीक्षक युवराज खड्काले बताए ।
यस्तै, पृथ्वीराजमार्ग अन्तर्गत आँबुखैरेनी गाउँपालिका-२ एक्लेफाँटमा मंगलबार दुइ बस एक आपसमा ठक्कर खाँदा दश जना घाइते भएका छन् । डुम्रेबाट आँबुखैरेनीतर्फजाँदै गरेको ना५ख ४९४१ नम्बरको बस र विपरित दिशाबाट आउँदै गरेको ना५ख ८८३३ नम्बरको बस एक आपसमा ठक्कर खाँदा दुवै बसमा सवार दश जना घाइते भएको बताइएको छ ।
घाइते हुनेहरुमा भानु नगरपालिका-९ बाइसजाँगर बस्ने २७ वर्षीय नविन श्रेष्ठ, गोरखा धुँवाकोट बस्ने ३० वर्षीया हिरा खड्का, भानु नगरपालिका-९ बस्ने २१ वर्षीय अरविन शाही, सोही ठाउँकी ५९ वर्षीया मिना श्रेष्ठ, गोरखा पालुङटार नगरपालिका-५ बस्ने ३५ वर्षीया हर्षिका तामाङ, सोही ठाउँकी ५२ वर्षीया फूलमाया तामाङ, आँबुखैरेनी गाउँपालिका-२ बस्ने २७ वर्षीया निर्मला सुनार, सोही ठाउँका २३ वर्षीय प्रदीप सुनार, बन्दीपुर गाउँपालिका-५ बस्ने ४८ वर्षीया सानुमाया गुरुङ, गोरखा बकराङ बस्ने मेखबहादुर थापा रहेको जिल्ला प्रहरी कार्यालय तनहुँले जनाएको छ । घाइतेमध्ये नविन श्रेष्ठको अवस्था गम्भीर रहेको बताइएको छ ।
घाइतेमध्ये तीन जनालाई थप उपचारका लागि भरतपुर पठाइएको छ भने अन्य घाइते उपचारपश्चात् घर फर्किएको इलाका प्रहरी कार्यालय आँबुखैरेनीका प्रहरी निरीक्षक निरज डाँगीले जानकारी गराए । ना५ख ४९४१ नम्बरको बस चालक नियन्त्रणमा रहेका छन् भने अर्का बस चालक फरार रहेको प्रहरीले जनाएको छ ।
