एमाले तनहुँद्वारा जिल्लाका १० वटै पालिकामा प्रशिक्षण आयोजना गर्ने

नेकपा एमाले तनहुँले जिल्लाका दशवटै पालिकामा प्रशिक्षण आयोजना गर्ने भएको छ । जिल्ला कमिटीका अध्यक्ष श्रीप्रसाद श्रेष्ठको अध्यक्षतामा बसेको बैठकले जिल्लाका सबै पालिकामा साउन २५ गतेभित्र प्रशिक्षण गर्ने निर्णय गरेको हो ।

बैठकले जिल्लास्तरीय प्रशिक्षण कार्यक्रम साउन १३ गते आयोजना गर्ने निर्णय गरेको सचिव राजेश्वर ढकालले जानकारी दिए । उक्त प्रशिक्षणमा जिल्ला कमिटीका सदस्य, जिल्ला सल्लाहकार, सबै जनसंगनठका जिल्ला अध्यक्ष, केन्द्रीय सदस्य, निर्वाचित अध्यक्ष, मेयर, उपमेयर पालिका कमिटीका पदाधिकारी, वडा कमिटीका अध्यक्ष, पालिकाका निर्वाचित कार्यपालिका सदस्य सबै सहभागी हुनेछन् ।

यस्तै साउन २४ गते देवघाटमा, २५ गतेभित्र आँबुखैरेनी, बन्दीपुर, भानु, व्यास, म्याग्दे, शुक्लागण्डकी, घिरिङ र भिमादको प्रशिक्षण हुनेछ । बैठकले सदस्यता नवीकरण अन्तर्गत वैशाखदेखि असारसम्मको लेवी सदस्यता शुल्क, पार्टी कार्यालयमा साउन १५ सम्म दाखिला गर्न सबै कमिटीलाई निर्देशन दिएको छ ।

बैठकले आगामी संघ र प्रदेशको निर्वाचनको कार्ययोजना पदाधिकारीले बनाई जिल्ला कमिटीमा पेश गर्ने निर्णय गरेको छ । जनसंगठन, फाँट र विभागका बैठक साउन मसान्तसम्म गरिसक्न निर्देशन जारी गरिएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर