आदिकविमा भवानी–सरस्वती अधिकारीको स्मृति अक्षय छात्रवृत्ति कोष स्थापना
दमौली : तनहुँको व्यास नगरपालिका–१३ ओटाङदी टोल निवासी बलभद्र अधिकारीले आफ्ना दिवंगत पिता भवानीप्रसाद अधिकारी र माता सरस्वती अधिकारीको स्मृतिमा आदिकवि भानुभक्त क्याम्पसमा अक्षय छात्रवृत्ति कोष स्थापना गरेका छन् ।
अधिकारीले विहीबार दिउँसो नबिल बैंकमा रहेको क्याम्पसको खातामा रु. ५० हजार ५५५ जम्मा गरी कोषलाई थप सबल बताएका छन् । उक्त रकम जम्मा गरेको बैंक भौचर क्याम्पस प्रमुख महाप्रसाद हड्खेलाई हस्तान्तरण गरिएको क्याम्पसले जनाएको छ ।
यसअघि पनि अधिकारीले २०७२ सालमा क्याम्पसलाई रु. १० हजार १९५ सहयोग गरेका थिए । दुबै रकम मिलाएर हाल कोषमा जम्मा भएको कुल रकम रु. ६० हजार ७५० पुगेको छ ।
स्थापना गरिएको अक्षय छात्रवृत्ति कोषको ब्याजबाट हरेक वर्ष क्याम्पसमा स्नातक तहमा अध्ययनरत व्यास–१३ का निम्न आय भएका जेहेन्दार विद्यार्थीलाई छात्रवृत्ति प्रदान गरिने व्यवस्था गरिएको क्याम्पसले जनाएको छ ।
