विकास निर्माणको मुल्याङ्कन गर्ने समय आयो : एमाले उम्मेदवार गुरुङ

नेकपा एमालेका स्थायी कमिटी सदस्य एवं तनहुँ क्षेत्र नं. २ का प्रतिनिधीसभा सदस्य उम्मेदवार किरण गुरुङले आफ्नो पार्टीको नेतृत्वले गर्दा भएका विकास निर्माण कार्यको जनताले मुल्याङ्कन गर्ने समय आएको बताएका छन् ।

शुक्लागण्डकीका विभिन्न क्षेत्रमा आइतबार भएका मतदाता भेटघाट तथा अन्तरक्रिया कार्यक्रममा बोल्दै उनले यस्तो बताएका हुन् । सडक, खानेपानी र विद्युत लगायतका क्षेत्रको सबै स्थानमा समान ढंगले विकास गर्ने नीति सरकारले ल्याएको उनले बताए ।

‘एक घर एक धाराको शुरुवात गण्डकी प्रदेशको अर्थमन्त्री हुँदा हामीले शुरुवात गर्‍यौं’, उनले भने, ‘यसअघि शहरमा मात्र घरघरमा धारा थिए । अहिले ग्रामीण भेगमा पनि खानेपानीका धारा बन्ने क्रम चलिरहेको छ । यसले शहर र गाउँलाई हेर्ने दृष्टिकोण एउटै भएको छ ।’

उनले बितेका समयमा विकासको लहर शुरुवात गर्ने समयको मुल्याङ्कन आगामी मंसिर ४ भएको उल्लेख गरे । गण्डकीमा करिव साढे तीन वर्ष पृथ्वी सुब्बा मुख्यमन्त्री हुँदा किरण अर्थ मन्त्री थिए । विपक्षीले यस क्षेत्रमा जितेर गएका व्यक्तिले केही काम गरेन भनेर हल्ला फिजाउने गरेको बताउँदै उनले विगतको पाँच वर्षाई मुल्याङ्कन गरी मतदान गर्न अपिल गरे ।

स्थानीयले दुलेगौंडा-हर्कपुर मोटरमार्ग निर्माणबारे उम्मेदवार गुरुङको ध्यानाकर्षण गराएका थिए । उम्मेदवार गुरुङले आफूनै अर्थमन्त्री हुँदा परेको यस सडक निर्माण व्यवसायी र विभिन्न कारणले सम्पन्न हुन नसकेको बताउँदै सम्पन्न गराउन आफ्नो पहल रहने बताए ।

यस्तै, तनहुँ २ प्रेदश १ का उम्मेदवार श्यामराजा महतले शुक्लागण्डकी क्षेत्रको क्रमिक रुपमा विकास हुँदै गएको बताउँदै निर्माणाधिन र अब गर्नुपर्ने काम आफूले गर्ने बताए । उनले योजनाकासाथ निर्वाचनमा होमिएको बताउँदै गर्न सकिने काममात्र मतदातालाई भन्ने गरेको प्रष्ट पारे । ‘कतिपयले तपाईलाई ठूला आश्वासन दिन आउँलान । उनीहरुप्रति सचेत हुनुहोला’, उनले भने, ‘म गर्न सकिने काम मात्र तपाईको बीचमा लिएर आएको छु ।’

सेयर गर्नुहोस्

प्रतिक्रिया दिनुहोस्

सम्बन्धित खवर