तनहुँ र पाल्पा जोड्ने कालीगण्डकी नदीमा पुल निर्माण कार्य तीव्र
भञ्ज्याङ न्यूज
गण्डकी र लुम्बिनी प्रदेश जोड्ने गरी तनहुँमा निर्माण भइरहेको मोटरेबल पुलको कार्य तीव्र गतिमा अघि बढाइएको छ । तनहुँको घिरिङ गाउँपालिका-१ र पाल्पाको रामपुर नगरपालिका-१ जोड्ने गरी कालीगण्डकी नदीमाथि पुल पुट्टारघाट (तनहुँ-पाल्पा) निर्माण कार्य भइरहेको हो ।
पुलको हालसम्म ५२ प्रतिशत काम सम्पन्न भएको कालीगण्डकी नदी मोटरेबल पुल निर्माण समितिका अध्यक्ष विष्णुभक्त सिग्देलले बताए।
संघीय सरकारको रु २४ करोडको लागतमा पुल निर्माण कार्य सुरु भएको हो । उनले भने, “दसैंअघि ७३ प्रतिशत काम सम्पन्न गर्ने गरी निर्माण कार्यलाई तीव्रता दिइएको छ ।”
आर्थिक वर्ष२०७३/०७४ मा सम्झौता गरी आव २०७९/०८० असार मसान्तभित्र सम्पन्न गर्ने गरी शर्मा एन्ड कम्पनी युनाइटेड बिर्ल्र्डस एन्ड रमण जेभीले ठेक्का सम्झौता गरेको सिग्देलले बताए।
हालसम्म तनहुँतर्फ तीन पाल्पामा एक र नदीको बीच भागमा एक पिल्लर निर्माण कार्य भएको छ । दुइ प्रदेश जोड्ने पहिलो पुल भएकाले पुल निर्माणपश्चात् लाखौ बासिन्दा प्रत्यक्ष लाभान्वित हुने छन् ।
नदीमा बाँध बाँधेर नदीको बहावलाई परिवर्तन गरी निर्माण कार्य भइरहेको उनले बताए । पुलको लम्बाइ २१० र चौडाइ १०.५० मिटरको हुनेछ ।
सुरुमा कालीगण्डकी वारपार गर्न डुङ्गाको प्रयोग गरी जोखिम किसिमले यात्रा गर्न र्सवसाधारण बाध्य भएपछि केही वर्षघि झोलुङ्गे पुल निर्माण गरिएको निर्माण समितिका सचिव डानस मल्लले बताए ।
झोलुङ्गे पुल निर्माणपछि मानिसलाई आवतजावतमा सहज भए पनि सामान ढुवानी गर्न सक्ने अवस्था थिएन । उनले भने, “लामो समयदेखिको स्थानीयवासीको सपना पूरा हुन लागेको छ ।”
