तनहुँका तीन क्याम्पसमा स्ववियु नेतृत्व चयन, दुइमा अनिश्चित

तनहुँका तीन वटा क्याम्पसमा स्ववियु निर्वाचनबाट नयाँ नेतृत्व चयन गरिएको छ । आइतबार सम्पन्न निर्वाचनबाट भिमादको जनज्योति, शुक्लागण्डकीको शहीदकृष्ण र आँवुखैरेनीको आँवुखैरेनी क्याम्पसमा स्ववियु नेतृत्व चयन गरिएको हो ।

भिमाद नगरपालिकास्थित जनज्योति क्याम्पसमा नेविसंघका विनोद पराजुली विजयी भएका छन् । निर्वाचनमा १७८ मत प्राप्त गरी पराजुली सभापतिमा विजयी भएका हुन् । सभापतिका उम्मेदवार अनेरास्ववियुका निषा श्रेष्ठले ९७ मत प्राप्त गरिन् । निर्वाचनमा नेविसंघको प्यानलै विजयी भएको छ । स्ववियु सचिवमा कल्पना सुनार र कोषाध्यक्षमा अमृत परियार विजयी भएका छन् । सदस्यहरुमा निशा भुजेल, सविता माल, सचिन श्रेष्ठ, इन्द्रावती सार्की र काशिका राना विजयी भएका छन् ।

यस्तै, शुक्लागण्डकी नगरपालिका-८ स्थित शहीदकृष्ण क्याम्पसमा नेपाल विद्यार्थी संघ नेतृत्वको प्यानल विजयी भएको छ। निर्वाचनमा यस क्याम्पसमा नेविसंघ नेतृत्वको प्यानल नै विजयी भएको हो । निर्वाचनमा ४० मतमध्ये ३७ मत खसेको थियो। सभापतिमा विष्णुबहादुर अधिकारीले २७ मत र प्रतिस्पर्धी अनेरास्ववियुका मनोज बानियाँले १० मत प्राप्त गरे । सचिवमा नेविसंघकै शालिग्राम पोख्रेलले २७ मत र उनका प्रतिस्पर्धी अनेरास्ववियुका ओमबहादुर महतले १० मत प्राप्त गरे।

सदस्यहरुमा विना विक ३०, थमनबहादुर भुजेल ३०, दिपिका काफ्ले ३१ र प्रमिला पौडेल ३१ मत प्राप्त गरी विजयी भएका छन् । कोषाध्यक्षमा भने अखिल -क्रान्तिकारी) की सुष्मा माकिम यसअघि नै निर्विरोध निर्वाचित भइसकेकी छन् ।

स्ववियु निर्वाचन अन्तर्गत आँबुखैरेनी क्याम्पसमा सत्तारुढ गठबन्धनले विजय भएको छ । अखिल -क्रान्तिकारी)को नेतृत्वको गठबन्धनले विजय हासिल गरेको हो । क्याम्पसको स्ववियु सभापतिमा अखिल (क्रान्तिकारी)का निशान मगर ११६ मत प्राप्त गरी विजयी भएका छन् । प्रतिस्पर्धी अनेरास्ववियुका कृशल कंडेलले ७२ मत प्राप्त गरेका छन् ।

सचिवमा नेविसंघका बोनिस अधिकारी ७२ मत प्राप्त गरी विजयी भएका छन् । प्रतिस्पर्धी अनेरास्ववियुका सविता श्रेष्ठले ६१ मत प्राप्त गरिन् । कोषाध्यक्षमा अखिल (क्रान्तिकारी)का श्वेता थापा १०८ मत प्राप्त गरी विजयी भइन् । प्रतिस्पर्धी अनेरास्ववियुका उज्ज्वल थापाले ६६ मत प्राप्त गरे । सदस्यहरुमा अखिल (क्रान्तिकारी)का अस्मिता श्रेष्ठ १०२, अर्पण देवकोटा १०७ र रविन कामी १०९ मत प्राप्त गरी विजयी भएका छन् । प्रतिस्पर्धी अनेरास्ववियुका इन्दु अधिकारीले ४९, सुरज श्रेष्ठले ५६ र अमृत कट्टेलले ४६ मत प्राप्त गरेका छन् । २६७ मतदाता रहेको निर्वाचनमा १९३ मत खसेको बताइएको छ ।

यस्तै, त्रिभुवन विश्वविद्यालयबाट मान्यताप्राप्त क्याम्पसहरुमा आइतबार स्ववियु निर्वाचनका लागि मतदान कार्यक्रम भएपनि तनहुँका पाँच मध्ये दुइ क्याम्पसमा निर्वाचन अनिश्चित बनेको छ । व्यास नगरपालिकास्थित आदिकवि भानुभक्त क्याम्पस र शुक्लागण्डकी नगरपालिकाको भानुभक्त बहुमुखी क्याम्पसमा भने निर्वाचन अनिश्चित बनेको हो । आदिकवि क्याम्पसले सूचना नै जारी गरी निर्वाचन स्थगित गरेको छ भने भानुभक्तमा नेविसंघ र अखिल क्रान्तिकारीले तालाबन्दी गरेपछि निर्वाचन प्रकृया सुरु हुन सकेको छैन ।

सेयर गर्नुहोस्

प्रतिक्रिया दिनुहोस्

सम्बन्धित खवर