तनहुँमा विभिन्न घटनामा तीन जनाको मृत्यु

तनहुँमा विभिन्न घटनामा परी तीन जनाको मृत्यु भएको छ । प्रहरीका अनुसार भिरबाट लडेर एक जनाको, पर्खालले च्यापिएर एकजना र मर्स्याङ्दीको ड्याममा एक जनाको शव भेटिएको छ ।

तनहुँको ऋषिङ गाउँपालिका-७ बाजगारा बस्ने ५३ वर्षीय कृष्णकुमार थापाको भिरबाट लडेर मृत्यु भएको छ । दमौलीबाट घर फर्कदै गरेका थापाको शनिबार १०:३० बजेको समयमा घर नजिकै रहेको चण्डि भयर सामुदायिक वनको गोरेटो बाटोदेखि अन्दाजी एक सय मिटर तल भिरमा लडेर मृत्यु भएको जिल्ला प्रहरी कार्यालय तनहुँले जनाएको छ ।

थापाको शव भद्रलेको रुखमा अडि्कएको अवस्थामा फेला परेको प्रहरीले जनाएको छ । उक्त घटनाको जानकारी आएपश्चात् प्रहरीले निजको शव निकालेको प्रहरी नायब उपरिक्षक मोहनबहादुर खाँणले जानकारी दिए । दमौली आएर आँखा सम्बन्धी उपचार गरेर घर फर्किदै गर्दा थापा भिरबाट खसेको बताइएको छ ।

रुखमा अडि्कएको अवस्थामा शव देखेपछि स्थानीयवासीले ऋषिङ रानीपोखरी प्रहरी चौकीमा खबर गरेका थिए । जिल्ला प्रहरी कार्यालय तनहुँका प्रहरी निरीक्षक राजकुमार विकको नेतृत्वमा गण्डकी प्रदेश प्रहरी गण पोखराबाट खटिएको विपद् उद्धारको संयुक्त टोलीले साढे तीन घण्टाको प्रयासपश्चात् निजको शव निकालेको प्रहरीले जनाएको छ । घटनासम्बन्धमा थप अनुसन्धान भइरहेको प्रहरीले उल्लेख गरेको छ ।

यस्तै, व्यास नगरपालिका-४ बाघबजार स्थित दमौली पार्टी प्यालेसको पर्खाल भत्काउदै गरेको अवस्थामा च्यापिएर एक जनाको मृत्यु भएको तनहुँ प्रहरीले जनाएको छ । पार्टी प्यालेसको पर्खाल भत्काउँदै गर्दा देवघाट गाउँपालिका वडा नं. ३ छिपछिपे स्थायी घर भएका अन्दाजी ३२ वर्षका भिम बहादुर गुरुङलाई सोही पर्खालले च्यापिएर टाउको समेतको भागमा चोट लागि गम्भिर घाइते भएका थिए । उनको दमौली अस्पतालमा उपचारका क्रममा सोमबार मृत्यु भएको र घटनाका विषयमा थप अनुसन्धान भइरहेको प्रहरी नायव उपरीक्षक मोहन बहादुर खाँणले जानकारी गराए ।

यस्तै, आँबुखैरेनी गाउँपालिका-२ मार्कीचोकस्थित जलविद्युत् आयोजनाको बाँधस्थलमा सोमबार एक युवकको शव फेला परेको छ । मर्स्याङ्दी जलविद्युत् आयोजनाको बाँधस्थलमा तनहुँको आँबुखैरेनी गाउँपालिका-६ स्थायी घर भई हाल गोरखा नगरपालिका-१४ याद्रोटमा डेरा गरी बस्ने १५ वर्षीय सोमबहादुर गुरुङको शव फेला परेको हो ।

स्थानीयवासीले शव देखेपछि प्रहरीलाई खबर गरेका थिए । तत्कालै सनाखत हुन नसके पनि पछि आफन्तको सहयोगमा उनको सनाखत भएको जिल्ला प्रहरी कार्यालय तनहुँका प्रहरी नायब उपरीक्षक खाँणले जानकारी दिए । घटना सम्बन्धमा अनुसन्धान भइरहेको उनले बताए ।

सेयर गर्नुहोस्

प्रतिक्रिया दिनुहोस्

सम्बन्धित खवर