बन्दिपुर वडा नं. १ को विपत कोषलाई दुइ लाख सहयोग
भञ्ज्याङन्यूज/डुम्रे
तनहुँको बन्दिपुर गाउँपालिका-१ को बिपद् व्यवस्थापन कोषमा एनएमबि बैक डुम्रे शाखाले दुइ लाख रुपैयाँ आर्थिक सहयोग गरेको छ । बैंकको सामाजिक उत्तरदायित्व कार्यक्रम अन्तर्गत सो रकम उपलब्ध गराइएको बैंकका शाखा प्रमुख संगम अधिकारीले बताए ।
बैंकका शाखा प्रमुख अधिकारीले वडाध्यक्ष शिवकुमार श्रेष्ठलाई उक्त रकम बराबरको चेक हस्तान्तरण गरेका छन् । अकस्मात भवितव्य पर्दा वा पृथ्वीराजमार्ग अन्तर्गत यस वडा क्षेत्रमा घरहरु भत्किदा जुनसुकै समयमा पनि बिपद आउन सक्ने भएकाले बिपद कोष खडा गरी रकम जम्म गर्न थालिएको वडाध्यक्ष श्रेष्ठले बताए ।
विपत कोषका लागि सडक आयोजनाबाट पाउने मुआब्जा समेत घरधनीहरुले लिएको मुआव्जाको ०.५ प्रतिशत बिपद कोषमा गर्नुपर्ने व्यवस्था भएपनि वडा कार्यलयले विपद कोष खडा गरेको अध्यक्ष श्रेष्ठले बताए ।
बैंकले गाउँपालिकाको वडा नं ४ लाई पनि एक लाख रुपैयाँ सहयोग गर्ने भएको छ । भवितव्य, बाढी पहिरो, वन्यजन्तु आक्रमण, आपतविपद, भूक्षय, भुकम्प, आगलागि लगायतका बिपदमा कोषमा जम्मा भएको रकमबाट राहत स्वरुप उपलब्ध गराउने व्यवस्था मिलाइने अध्यक्ष श्रेष्ठले बताए ।
बिपद न्यूनिकरणको पूर्वतयारीका लागि अग्निजन्य नियन्त्रण, बाढी पहिरो, नदीजन्य उद्दार लगायतका सामाग्रीहरु वडा कार्यालयमा व्यवस्थापन गरिएको छ । बिपदको पूर्व तयारीमा अन्य वडा कार्यालयको तुलनामा यस वडा कार्यालय अग्रस्थानमा रहेको छ ।
