व्यासनगर साइनिङ स्टारको नवौं संस्करण : साउन १२ र १३ गते अडिसन हुने
भञ्ज्याङन्यूज
तनहुँमा व्यासनगर साइनिङ स्टारको नवौं संस्करण हुने भएको छ । जेसीआई व्यासनगरले सञ्चालन गर्दै आएको साइनिङ स्टारको नवौं संस्करणका लागि यही साउन १२ र १३ गते दमौलमिा अडिसन गर्ने भएको छ ।
बालबालिकाहरुको प्रतिभा प्रष्फुटन गराउने उद्देश्यका साथ सञ्चालन गर्दै आएको व्यास नगर साइनिङ स्टारको अडिसन यास-४ स्थित दमौली कलेजको प्रांगणमा हुने आयोजकले शनिबार दमौलीमा पत्रकार सम्मेलन गरी जानकारी गराएको छ।
यस कार्यक्रमको फिनाले भने भदौ १५ गते हुने जेसीआई व्यास नगरका अध्यक्ष राजु रानाले बताए । यसअघि नगर क्षेत्रका ९-१४ बर्ष उमेर समुहका बालबालिकाले अडिसन दिन पाउने व्यवस्था रहेकोमा यस बर्षदेखि १०-१५ बर्षउमेर समुहका बालबालिका अडिसनमा सहभागी गराइने भएको छ ।
अडिसनबाट छनोट हुने २० जना बालबालिकाहरुलाई एक महिनासम्म विभिन्न विधाका प्रशीक्षण र तालिम प्रदान गरिने कार्यक्रमका मुल संयोजक अजर नागिलाले बताए ।
एक महिने प्रशीक्षण, तालिम र विभिन्न अवलोकन भ्रमण गराएपछि अन्तिममा ४ जना निर्णायकहरुको निर्णयबाट उत्कृष्ट हुने प्रतिभा व्यास नगर साइनिङ स्टार घोषित गरिने भएको छ ।
व्यास नगर साइनिङ स्टार २०२२ को उपाधि जित्नेलाई नगद रु २५ हजार २३, ट्रफी र प्रमाणपत्र प्रदान गरिनेछ । फस्ट रनर अफले १५ हजार २३ रुपैयाँ र सेकेण्ड रनर अफ हुनेलाई १० हजार २३ रुपैयाँ नगद सहित ट्रफी र प्रमाणपत्र प्रदान गरिने आयोजकले जनाएको छ ।
प्रतियोगितामा बेस्ट पर्सनालिटी, बेस्ट वाल्क, बेस्ट फोटोजेनिक, बेस्ट ट्यालेन्ट, बेस्ट स्माइल, बेस्ट ड्रेस, बेस्ट अनुशासन, बेस्ट प्रोजेक्ट वर्क, बेस्ट भ्युवर च्वाईस र बेस्ट कन्टि्रव्युसन गरी १० वटा विधागत अवार्डहरु पनि रहने आयोजकले जनाएको छ ।
१० विधामा उत्कृष्ट हुनेलाई जनही रु २ हजार र आकर्ष पुरस्कारको व्यवस्था गरिएको कार्यक्रम मूल संयोजक नागिलाले बताए ।
व्यास नगर साइनिङ स्टारमा प्रतिस्पर्धा गरेका बालबालिकाहरुले विभिन्न क्षेत्रमा उत्कृष्ट कार्य गरिरहेकाले यसले समाजलाई महत्वपूर्ण योगदान पुगेको पूर्व अध्यक्ष एकप्रसाद श्रेष्ठले बताए ।
प्रतियोगिताको मुख्य उद्देश्य नै व्यक्तित्व र नेतृत्व विकास भएको बताउँदै बालबालिकालाई टिकट बिक्री गर्न प्रेसर नगर्ने श्रेष्ठले बताए । उनले भने ‘विद्यालय समय प्रभावित नहुने गरी पढाइको अतिरिक्त हामीले बालबालिकाको जीवन सफल र र्सार्थक बनाउन विभिन्न जीवनपयोगी सीप प्रदान गर्ने गर्र्छौं ।’
बालबालिकाको अन्तरनिहीत प्रतिभा प्रस्फुटन गराउँदै व्यक्तित्व र नेतृत्व विकास, शारीरिक तन्दुरुस्ती, कला संस्कृति लगायत विविध समसामयिक विषयको ज्ञान प्रदान गर्ने उद्देश्य राखेर जेसीआई व्यास नगरले २०१३ देखि निरन्तर व्यास नगर साइनिङ स्टार प्रतियोगिता सञ्चालन गर्दै आएको छ ।
