एसिया कप किक्रेट : पाकिस्तानले दियो नेपाललाई ३४३ रन बनाउने चुनौती
एसिया कप क्रिकेटमा पाकिस्तानले नेपाललाई ३४३ रन बनाउने चुनौती दिएको छ । पहिलो ब्याटिङ गर्दै निर्धारित ५० ओभरको खेलमा पाकिस्तानले ६ विकेटको क्षतिमा ३४२ रन बनाएको हो ।
पाकिस्तानका लागि कप्तान बाबर आजमले १५१ रन बनाएका छन् । उनले १३१ बलको सामना गर्दै ४ छक्का र १४ चौकाको मद्दतले कुल १५१ रन बनाएका हुन् ।
यस्तै, मध्यक्रममा खेल्न आएका इफ्तिखार अहमदले ७१ बलमा अविजित १०९ रन बनाएका थिए । अहमदले आजमसँगको साझेदारीमा कुल २१४ रन बनाएसँगै पाकिस्तान ठूलो स्कोर खडा गर्न सफल भएको हो । पाकिस्तानका लागि मोहमद रिजवानले ५० बलको सामना गर्दै ४४ रन बनाएका थिए ।
नेपालका लागि पहिलो विकेट करण केसीले लिएका थिए भने दोस्रो र तेस्रो विकेट रनआउट भएको थिए । रोहित पौडेल र दीपेन्द्रसिंह ऐरीले पाकिस्तानका दुई ब्याट्स्म्यानलाई अप्रत्यासित रूपमा रनआउट गर्न सफल भएका थिए ।
नेपालका लागि चौथो विकेट सन्दीप लामिछानेले लिएका थिए । लामिछानेको बलमा आउट हुनु अघि आघा सलमानले मात्र ५ रन बनाउन सके । पाँचौं र छैठौं विकेट भने सोमपाल कामीले लिए । नेपालका प्राय सबै बलर पाकिस्तानी ब्याट्स्म्यानको अगाडि निरिह सावित भए ।
पाकिस्तानले एसिया कप क्रिकेटमा नेपालविरुद्ध पहिला ब्याटिङ रोजेको थियो । कप्तान बाबार आजमले टस जितेपछि घरेलु टोली पाकिस्तानले मुल्तान क्रिकेट रंगशालामा नेपाललाई फिल्डिङका लागि बोलाएको थियो ।
