भानुमा अन्तर विद्यालय भलिबल प्रतियोगिता हुने
भञ्ज्याङ समाचारदाता/भानु
तनहुँको भानु नगरपालिकाले नगरस्तरीय अन्तर विद्यालय मैत्रीपूर्ण भलिबल प्रतियोगिता गर्ने भएको छ । शिक्षक ज्ञानका खानी मात्र होइनन् सिर्जनाका स्रोत पनि हुन् भन्ने उद्देश्यले सामुदायिक विद्यालयमा अध्यापनरत पुरुष शिक्षकहरु बीच मैत्रीपूर्ण भलिबल प्रतियोगिता गर्न लागिएको नगर शिक्षा अधिकारी ध्रुवराज पौडेलले बताए ।
शिक्षकमा अन्तरनिहित प्रतिभा र क्षमताको उजागर गर्नुका साथै शिक्षकहरू बीच आपसी अन्तरघुलन, अनुभवको शेयरिङ्, सहकार्य र सामुहिक सिकाइको माध्यमबाट पेशागत क्षमता विकास, आपसी विश्वास र एकता अभिवृद्धि गर्नु आवश्यक रहेको र यसै तथ्यलाई आत्मसात गरी यो प्रतियोगिता आयोजना गरिएको उनले बताए ।
माघ १९ र २० गते सञ्चालन हुने उक्त प्रतियोगिताका लागि माघ १८ गते दिउँसो १ बजेभित्र नगरपालिकाको शिक्षा, युवा तथा खेलकुद शाखामा उपलब्ध खेलाडीको नाम उपलब्ध गराउन भनिएको छ ।
भानु-२ स्थित होमराज लोहनी शारदा शिक्षा सदन माध्यमिक विद्यालयमा हुने प्रतियोगितामा प्रथमलाई १५ हजार, द्वितीयलाई १२ हजार, तृतीयलाई १० हजार रुपैयाँ नगद, ट्रफी, मेडल र प्रमाणपत्र प्रदान गरिने भएको छ ।
