सवारीसाधनको सुविधाले विद्यालय आवतजावतमा सहज
तनहुँको आँबुखैरेनी गाउँपालिका-५ लाब्दीकी मुना गुरुङ विद्यालय जान साढे दुइ घण्टा पैदल हिँड्ने गर्नुहुन्थ्यो । बिहान ७:३० बजे घरबाट हिँडेपछि मात्रै उहाँ समयमै विद्यालय पुग्नुहुन्थ्यो । विद्यालयबाट घर फर्किनका लागि पनि गुरुङलाई त्यति नै समय लाग्थ्यो । वर्षौदेखि यसरी नै हिँडेर विद्यालय आवतजावत गरिरहनुभएकी उहाँलाई अहिले हिँड्नु पर्दैन । घरदेखि विद्यालयसम्म आवतजावत गर्न जिप चढ्न पाइने भएपछि समय बचत भएको र बचेको समय अध्ययनमा लगाउन सहज भएको छ ।
आँबुखैरेनी गाउँपालिका-६ हिलेखर्कस्थित कन्यादेवी माध्यमिक विद्यालयमा कक्षा १० मा अध्ययनरत गुरुङले पैदलयात्राको बाध्यताबाट मुक्ति पाएसँगै अध्ययनमा सहज भएको बताउनुभयो । गाउँपालिकाले घण्टौँ हिँडेर विद्यालय जानुपर्ने अवस्था अन्त्य गर्न गाउँपालिकाभित्रका तीन विद्यालयलाई जिप सुविधा उपलब्ध गराएको हो ।
कन्यादेवी माध्यमिक विद्यालयका प्रधानाध्यापक सूर्यमानसिंह गुरुङले जिप उपलब्ध भएपछि विद्यार्थीलाई सहज भएको बताउनुभयो । विद्यालयमा एक सय २४ विद्यार्थी अध्ययनरत रहेकामा ८० बालबालिकाले दैनिक विद्यालयमा आवतजावतमा तीनदेखि पाँच घण्टा यात्रा गर्नुपर्ने अवस्था छ ।
विद्यालय आवतजावतका लागि विगत लामो दशकदेखिको कष्टकर हिँडाइको यात्रामा पूर्णबिराम लागेको छ । कैयौँ वर्षदेखि विद्यार्थी यसरी नै हिँडेर विद्यालय आवजावत गर्नुपर्थ्यो तर अहिले दुइ वटा जिपले दैनिक दुइपटक विद्यार्थी ल्याउने र घर लैजाने गरेको छ । वडा नं ५ मा एउटा र वडा नं ६ का लागि अर्को जिप सञ्चालन गरिएको छ । वडा नं ५ मा चल्ने जिपले बाटोमा पर्ने वडा नं ६ का विद्यार्थीलाई पनि विद्यालय ल्याउने लैजाने गरेको छ । दुवै वडाका गरेर ८० विद्यार्थीले यो सुविधा पाएका प्रधानाध्यापक गुरुङको भनाइ थियो ।
विद्यालय रहेको हिलेखर्कमा ६० घरधुरीमध्ये १८ विद्यार्थी मात्रै विद्यालयमा अध्ययनरत छन् । बाँकी विद्यार्थी वडा नं ५ र ६ का हुन् । घरदेखि विद्यालय टाढा रहेका विद्यार्थीलाई हिँडेर विद्यालय जान नपरोस् भन्नका लागि जिप सुविधा उपलब्ध गराइएको गाउँपालिकाका अध्यक्ष शुक्र चुमानले जानकारी दिनुभयो । बस खरिद गरेर उपलब्ध गराउने योजनाअनुरुप बस नआइञ्जेल जिप सुविधा प्रदान गरिएको उहाँको भनाइ थियो ।
यसैगरी आँबुखैरेनी गाउँपालिका-२ स्थित अन्नपूर्ण आधारभूत विद्यालय, अकला आधारभूत विद्यालय र वडा नं ६ स्थित कन्यादेवी माध्यमिक विद्यालयका लागि सवारीसाधन उपलब्ध गराइएको छ । अध्यक्ष चुमानले भन्नुभयो, “घण्टौं हिँडेर अब कोही पनि विद्यालय जानुपर्दैन ।
त्यसका लागि बस सुविधा उपलब्ध गराउँछौं, सवारीसुविधा प्रयोग गरेबापत एक रुपैयाँ पनि तिर्नुपर्दैन । विद्यालय आवतजावत गर्न घण्टौँ हिँड्नुपर्ने र त्यसले गर्दा पढाइमा समस्या भएपछि सवारी साधनको व्यवस्था गरिएको हो।” उक्त गाउँपालिकाले वडानं १ समस्तीपुरस्थित चन्द्रोदय माध्यमिक विद्यालय र वडानं २ स्थित अकला आधारभूत विद्यालयलाई बस उपलब्ध गराएको छ । गाउँपालिकाले आन्तरिक स्रोतबाट रु ५६ लाखको लागतमा उक्त बस खरिद गरेको हो ।
