भिमादमा राष्ट्रिय परिचयपत्र सेवा सुरु, डुम्रेमा पनि स्टेशन राख्ने तयारी
तनहुँ : तनहुँको भिमाद नगरपालिकामा राष्ट्रिय परिचयपत्र विवरण दर्ता स्टेशन सञ्चालनमा ल्याइएको छ । नगरपालिकाका प्रमुख प्रशासकीय अधिकृत शोभाखर पोखरेलले मंगलबार एक सूचना जारी गर्दै भिमाद नगरपालिका, घिरि गाउँपालिका, ऋषिङ गाउँपालिकाको वडा नं. ५, ६, ७ र ८ र म्याग्दे गाउँपालिका वडा नं. ५ कार्यक्षेत्र रहने गरी राष्ट्रिय परिचयपत्रको लागि वायोमेट्रिक लिने, फोटो खिच्ने कार्य नगरपालिकाको कार्यालयबाट सेवा सञ्चालनमा रहेको जानकारी गराएका छन् ।
राष्ट्रिय परिचयपत्रको विवरण संकलनकालागि आवश्यक उपकरण तथा सामग्री जडानको काम सकिएसंगै सेवा सञ्चालनमा ल्याइएको हो । स्टेशन सञ्चालनमा आएपछि जिल्लाको पश्चिमी तथा दक्षिणी भेगका नागरिकले राष्ट्रिय परिचयपत्र बनाउन सदरमुकाम दमौली धाउनुपर्ने बाध्यता हटेको छ ।
जिल्ला प्रशासन कार्यालय तनहुँले भिमाद बजारमा दुईवटा विवरण दर्ता स्टेशन स्थापना गरेको छ । स्टेशन सञ्चालनका लागि आवश्यक उपकरण तथा सामग्री जडान सोमबारदेखि सुरु भएसँगै सेवा सञ्चालनमा ल्याइएको हो ।
प्रमुख जिल्ला अधिकारी शिवलाल तिवारीका अनुसार भिमादमा स्टेशन सञ्चालन भएपछि भिमाद नगरपालिका, घिरिङ गाउँपालिका, ऋषिङ गाउँपालिका, शुक्लागण्डकी नगरपालिका र म्याग्दे गाउँपालिकाका नागरिकले स्थानीयस्तरबाटै राष्ट्रिय परिचयपत्र सम्बन्धी सेवा लिन सक्नेछन् ।
जिल्ला प्रशासन कार्यालय दमौलीमा राष्ट्रिय परिचयपत्र बनाउन सेवाग्राहीको चाप बढ्दै गएपछि सेवा विस्तारका लागि भिमादमा स्टेशन स्थापना गरिएको हो । सेवाग्राहीको चाप व्यवस्थापन गर्न प्रशासनले टोकन प्रणाली लागू गर्नुका साथै आवश्यकताअनुसार बिदाका दिन र अतिरिक्त समयमा समेत विवरण दर्ताको सेवा दिँदै आएको छ ।
प्रशासनले सेवाग्राहीको चापअनुसार जनशक्ति तथा उपकरण थप गर्न माथिल्लो निकायमा समेत पत्राचार गरेको जनाएको छ । भिमादमा दुईवटा स्टेशन सञ्चालनमा आएपछि दमौलीमा रहेको सेवाग्राहीको चापसमेत घट्ने अपेक्षा गरिएको छ ।
यसैगरी, जिल्लाको पूर्वी तथा उत्तरी क्षेत्रका नागरिकलाई लक्षित गरी डुम्रे आसपासमा अर्को राष्ट्रिय परिचयपत्र विवरण दर्ता स्टेशन स्थापना गर्ने तयारी भइरहेको छ। भानु नगरपालिका, बन्दीपुर गाउँपालिका, आँबुखैरेनी गाउँपालिका र देवघाट गाउँपालिकाका नागरिकलाई लक्षित गरी स्टेशन स्थापना गर्न लागिएको हो ।
प्रजिअ तिवारीका अनुसार डुम्रेमा स्टेशन सञ्चालनका लागि आवश्यक कार्यालय व्यवस्थापन गर्न उपयुक्त स्थानको खोजी भइरहेको छ ।
राष्ट्रिय परिचयपत्रको विवरण दर्ताका लागि सदरमुकामसम्म पुग्नुपर्ने बाध्यता हटाउँदै स्थानीय तहबाटै सेवा उपलब्ध गराउने तयारीले नागरिकको समय, खर्च र आवतजावतको झन्झट कम हुने अपेक्षा गरिएको छ । जिल्लाका विभिन्न भेगमा विवरण दर्ता स्टेशन विस्तार भएपछि प्रशासन कार्यालयमा हुने सेवाग्राहीको भीडसमेत व्यवस्थापन गर्न सहज हुने देखिएको छ ।
