दमौली अस्पताललाई व्यास नगरपालिकाले रकम उपलब्ध गराउने

तनहुँको व्यास नगरपालिकाले दमौली अस्पताललाई छ लाख रुपैयाँ अनुदान उपलब्ध गराउने निर्णय गरेको छ । नगर कार्यपालिकाको बैठकले अस्पतालमा कार्यरत गाइनोलोजिष्ट र एनेस्थेसिस्टका दुइजना चिकित्सकलाई पारिश्रमिकबापत उक्त रकम उपलब्ध गराउने निर्णय गरेको हो ।

सुत्केरीको शल्यक्रिया सेवालाई निरन्तरता दिन चालु आर्थिक वर्षको छ महिना नगरपालिकाले अनुदान दिएर सहयोग गर्न लागेको व्यास नगरपालिकाका प्रवक्ता जीवन गुरुङले बताएका छन् । यही पुस २५ गते हुने ४०औं व्यास नगरसभासमक्ष उक्त प्रस्ताव पेस गर्ने तयारी गरिएको प्रवक्ता गुरुङले बताए ।

दमौली अस्पतालमा स्तरोन्नतिका लागि यसअघि पटक-पटक प्रदेश सरकारसँग अनुरोध गर्दै आएपनि स्तरोन्नति नभएकाले हालको अवस्थामा नगरपालिकाले अनुदान दिएर सेवालाई निरन्तर दिने तयारी गरेको हो ।

यस्तै, आर्थिक वर्ष २०८०/०८१ का लागि सडक बोर्ड अन्तर्गतका एक करोड ३५ लाख ७२ हजार रुपैयाँ बराबरको प्रस्तावित कार्यक्रम स्वीकृतिका लागि सडक बोर्ड नेपालसमक्ष पेस गरिने भएको छ ।

सेयर गर्नुहोस्

प्रतिक्रिया दिनुहोस्

सम्बन्धित खवर