बैंकिङ कसुरमा जरिवाना तोकिएका विक पक्राउ
दमौली । बैंकिङ कसुर मुद्धामा उच्च अदालत पोखराबाट जरिवाना फैसला भई फरार रहेका तनहुँका एक प्रतिवादीलाई प्रहरीले पक्राउ गरेको छ । पक्राउ पर्नेमा तनहुँको शुक्लागण्डकी नगरपालिका–४ दुलेगौडा बस्ने ४९ वर्षीय गोपीराम विश्वकर्मा रहेको प्रहरीले जनाएको छ ।
बैंकिङ कसुर मुद्धामा उच्च अदालत पोखराको विसं २०७९ असार १३ गतेको फैसला बमोजिम रु नौ लाख ४९ हजार जरिवाना तोकिएका उनी उक्त रकम भुक्तान नगरी फरार रहेका थिए । प्रहरीले निजलाई मंगलबार दिउँसो पक्राउ गरी जरिवाना भुक्तानका लागि तनहुँ जिल्ला अदालत उपस्थित गराएको प्रहरी नायब उपरिक्षक दीपक रायले जानकारी दिए ।
विभिन्न अपराध एवं मुद्धाहरुमा संलग्न रही फरार रहेका तथा अदालतबाट फैसला भई दण्ड, जरिवाना, दसौदी, कोर्ट फि र सरकारी बिगो समेत तिर्न बाँकी भएका व्यक्तिहरुको खोजीकार्यलाई तीव्र बनाइएको प्रहरीले जनाएको छ ।
