शुक्लागण्डकीको खैरेनी माविको नवनिर्मित ८ कोठे भवन उद्घाटन
दुलेगौंडा : तनहुँको शुक्लागण्डकी नगरपालिका–६ खैरेनीटारस्थित खैरेनी माध्यमिक विद्यालयको नवनिर्मित भवनको उद्घाटन गरिएको छ । नेपाल हेल्फ वाईलंग्रीस जर्मनको आर्थिक सहयोग निर्मित भवनको शुक्लागण्डकी नगरपालिकाका नगरप्रमुख कृष्णराज पण्डित र जर्मनी संस्थाका अध्यक्ष मानफ्रेड लिन्डरले सोमबार एक कार्यक्रमका बीच संयुक्त रूपमा उद्घाटन गरेका हुन् ।
भवन उद्घाटन गर्दै नेपालहेल्फ वाईलंग्रीस जर्मनका अध्यक्ष मानफ्रेड लिन्डरले विद्यार्थी र शिक्षा हरेक देशको भविष्य निर्धारणको प्रमुख आधार भएको बताए । साथै उनले नवनिर्मित भवनको संरक्षण र प्रयोगमा विशेष ध्यान दिन आग्रह गरे ।
कार्यक्रममा शुक्लागण्डकी नगरपालिका नगरप्रमुख कृष्णराज पण्डितले नेपालहेल्फ वाईलंग्रीसले निर्माण गरिदिएको भवनको व्यवस्थापन खर्च स्थानीय सरकारबाट गरिने प्रतिबद्धता जनाए ।
विद्यालय व्यवस्थापन समितिका अध्यक्ष कोमलमोहन घिमिरेको सभापतित्वमा आयोजित कार्यक्रममा शुक्लागण्डकी नगरपालिकाका उपप्रमुख खुमबहादुर विक (राजु), वडा नं. ६ का वडाध्यक्ष बुद्धिबहादुर थापा, विद्यालयका प्रधानाध्यापक राजेश्वर घिमिरे लगायतले आ–आफ्ना विचार व्यक्त गरेका थिए ।
२०८० साल माघ महिनाबाट निर्माण थालिएको भवन निर्माण सम्पन्न गरी जर्मनी संस्थाले विद्यालयलाई हस्तान्तरण गरेको हो । करिब २ कारोड रुपैयाँको लागतमा निर्माण भएको भवनमा ८ कक्षाकोठा, शौचालय सहितको चेन्जिङ्ग कोठा रहेको विद्यालयका सूचना अधिकारी राजकुमार भुजेलले बताए ।
भवनको उद्घाटन कार्यक्रममा नेपालहेल्फ वाईलंग्रीसलाई पञ्चेवाजा सहित विद्यार्थी, शिक्षक र जनप्रतिनिधिले स्वागत गरेका थिए भने कार्यक्रममा नेपालको संस्कार, संस्कृति र सभ्यता झल्कने साँस्कृतिक कार्यक्रम प्रस्तुत गरिएको थियो ।
