आस्था र विश्वासको धरोहर ‘छिम्केश्वरीमाई’
तनहुँको आँवुखैरेनी गाउँपालिका–५ स्थित छिम्केश्वरीमाईको मन्दिरमा फागु पुर्णिमाको दिन पुगेका दर्शानार्थी । फागु पुर्णिमाका दिने विशेष पूजा अर्चना तथा मेला भर्न भक्तजनहरु पुग्ने गर्दछन् । बिहीबार करिब नौ हजार भक्तजन मन्दिरमा पुगेको छिम्केश्वरी पर्यटन विकास समितिका अध्यक्ष कृष्ण तामाङले बताएका छन् ।
तनहुँको सबै भन्दा अग्लो पहाडी श्रृंखला दुई हजार १३४ मिटर उचाइमा फैलिएको छिम्केश्वरी क्षेत्र र यस मन्दिरलाई गाउँपालिकाले धार्मिक पर्यटकीय गन्तव्यका रुपमा विकास गर्दै लगेको र फागु पुर्णिमाका दिन तनहुँका विभिन्न स्थानसँगै गोरखा, लमजुङ, कास्की र चितवनबाटसमेत भक्तजन पुग्ने गर्दछन् ।
यहाँ भाकल गरेपछि मनोकांक्षा पूरा हुने भक्तजनहरुको आस्था र विश्वास रहेको छ । मन्दिरमा बोकाको बली दिनुका साथै जोडी परेवा उडाउने, नरिवल चढाउने गरिन्छ । मन्दिरमा हरेक बर्ष फागु पुर्णिमा र बैशाखे पुर्णिमामा भक्तजनको विशेष भीड लाग्दछ ।
गोरखाको प्रसिद्ध मनकामना माइको जेठी दिदी बुढिकन्यादेवी माई र माइली दिदिको रुपमा चिनिने छिम्केश्वरी माईको मन्दिर छ । मनकामना दर्शन गरेकाले यहाँ दर्शन गर्नैपर्ने धार्मिक मान्यता रहदै आएको छ ।
पूर्वाधार विकास र प्रचारप्रसारले ओझेलमा परेको छिम्केश्वरी क्षेत्रलाई धार्मिक पर्यटकीय गन्तव्यका रुपमा विकास गर्न आवश्यक पूर्वधार निर्माण गर्दै लगिएको छ ।
तस्विर : सम्झना रसाइली/भञ्ज्याङ
