ग्वास्लुङ्गमा नियमित खोप तथा पोषण प्रवर्द्धन कार्यक्रम
ऋषिङ : तनहुँको ऋषिङ्ग गाउँपालिका–२ ग्वास्लु स्थित ग्वास्लुङ्ग सामुदायिक स्वास्थ्य इकाईले नियमित मासिक खोप सेवा तथा सरसफाइ प्रवर्द्धन कार्यक्रम गरिएको छ । कार्यक्रममा स्वास्थ्य आमा समूहको बैठकमा बालबालिका तथा गर्भवती महिलाको पोषण सुधारका लागि विभिन्न गतिविधिहरू सञ्चालन गरिएको थियो ।
स्वास्थ्य संस्थाले ६ महिनादेखि २ वर्ष मुनिका बालबालिकालाई ‘बाल भिटा’ वितरण गर्ने तथा आमाबुबालाई यसको प्रयोगबारे जानकारी गराइएको थियो । स्वास्थ्यकर्मीका अनुसार बाल भिटा दैनिक एक पुरिया थप खानामा मिसाएर खुवाउनु पर्ने हुन्छ, जसले बालबालिकाको पोषण स्तरमा सुधार ल्याउन मद्दत गर्छ ।
कार्यक्रममा गर्भवती महिलाहरूको पोषण अवस्था जाँच गर्नुका साथै २ वर्ष मुनिका बालबालिकाहरूको तौल मापन तथा मध्य पाखुराको नाप लिई पोषण स्तरको मूल्याङ्कन गरिएको थियो ।
उक्त अवसरमा आमाहरूलाई बालबालिकाको पोषण सुधारमा थप ध्यान दिन, सरसफाइमा विशेष ख्याल राख्न, र नियमित खोप लगाउन प्रेरित गरिएको थियो । स्थानीय स्वास्थ्यकर्मीहरूले सन्तुलित आहार र नियमित स्वास्थ्य परीक्षणको महत्वबारे जानकारी गराउँदै, यस्ता कार्यक्रमहरूलाई निरन्तरता दिने प्रतिबद्धता जनाएका थिए ।
कार्यक्रमले ग्वास्लुङ्गका स्थानीय बासिन्दाहरूमा स्वास्थ्यप्रति सचेतना बढाउने र कुपोषण न्यूनीकरणमा महत्वपूर्ण योगदान पु¥याउने विश्वास गरिएको ग्वास्लुङ्ग सामुदायिक स्वास्थ्य इकाईले जनाएको छ ।
